SON DƏQİQƏ

İstanbulda türkdilli ölkələrin Məhkəmə-Hüquq şuralarının toplantısı keçirilib.

"EMTV.az" xəbər verir ki, Ali Məhkəmənin mətbuat xidmətindən bildiriblər ki, tədbirdə Azərbaycan, Türkiyə, Qazaxıstan və Qırğızıstandan nümayəndələr iştirak ediblər.

Toplantıda Azərbaycanın Ali Məhkəməsinin sədri Ramiz Rzayev çıxış edərək ölkəmizdə məhkəmə fəaliyyətinin təkmilləşdirilməsi sahəsində həyata keçirilmiş genişmiqyaslı islahatlar, xüsusilə son dövrlər ədalət mühakiməsinin səmərəliliyinin artırılması üzrə görülmüş mütərəqqi tədbirlər barədə ətraflı məlumat verib. R.Rzayev, həmçinin məhkəmə hakimiyyətinin özünüidarə orqanı olan Məhkəmə-Hüquq Şurasının potensialının daha da artırılmasına, məhkəmə islahatlarının əsas istiqamətverici qüvvəsi kimi onun səlahiyyətlərinin genişləndirilməsi ilə bağlı görülən işlərdən də danışıb.

Ali Məhkəmənin sədri ölkəmizdə məhkəmə sistemində şəffaflığın artırılması üzrə əlavə tədbirlərin görüldüyünü, ictimai iştirakçılıq və vətəndaş cəmiyyəti ilə əməkdaşlığın genişləndirildiyini bildirərək bunun üçün Azərbaycan Prezidentinin ötən il imzaladığı “Elektron məhkəmə” informasiya sisteminin yaradılması haqqında” Sərəncamın əhəmiyyətini vurğulayıb. Bildirib ki, artıq sınaq rejimində istifadəsinə başlanılan “Elektron məhkəmə” informasiya sisteminin tam tətbiqi nəticəsində insanlar məhkəməyə gəlmədən, elektron formada müraciət edəcək, məhkəmə prosesləri, qərarlar, onların icra vəziyyəti və s. məlumatları əks etdirən elektron “şəxsi kabinetə” malik olacaqlar. Nəticə etibarilə məhkəməyə müraciət imkanları daha da genişlənəcək, süründürməçilik və sui-istifadə hallarının qarşısı alınacaq, şəffaflıq və operativlik təmin ediləcək. Həmçinin sistem vasitəsilə hakimin işinin səmərəliliyi də yoxlanılacaq.

Qeyd olunub ki, demokratik, hüquqi, dünyəvi dövlət quruculuğu yolunu seçmiş ölkəmizdə məhkəmə fəaliyyətinin daha da təkmilləşdirilməsi üçün ədalət mühakiməsinin səmərəliliyinin artırılması, məhkəmə hakimiyyətinin müstəqilliyinə əlavə təminatların müəyyənləşdirilməsi üzrə davamlı islahatların həyata keçirilməsi dövlətimizin bu sahədəki siyasətinin əsasını təşkil edir.

Toplantı iştirakçıları öz ölkələrinin müvafiq qurumlarının təşkili, fəaliyyəti və səlahiyyətləri barədə məlumat verib, qanunvericilikdən və onun tətbiqi təcrübəsindən irəli gələn problemləri müzakirə edib, ortaq inkişaf hədəfləri barədə fikir mübadiləsi aparıblar.