SON DƏQİQƏ

Jurnalistin məhkəməsində şahid ifadələri başa çatdı; vəkili: “Onun əleyhinə ümumiyyətlə, ifadə yoxdur...”
Dekabrın 9-da Bakı Ağır Cinayətlər Məhkəməsində “Ayna-Zerkalo” qəzetinin əməkdaşı Rauf Mirqədirovun məhkəməsi keçirildi. Saat 10:30-da Əlisultan Osmanovun sədrliyi ilə başlayan proses əvvəlkilərə nisbətən tez yekunlaşdı.

Məhkəmə qapalı olduğundan keçən bir saat ərzində iclasdan xəbər tutmaq mümkün olmadı. Jurnalistə dəstək olmaq üçün məhkəmə binasının qarşısına demək olar ki, heç kim gəlməmişdi - yalnız ailə üzvlərindən və iki media orqanının nümayəndəsindən başqa...

Saat 11:30-da yekunlaşan prosesdən sonra Mirqədirovun vəkili Fuad Ağayev mətbuata açıqlama verdi. O, məhkəmənin yekunlaşmağa doğru getdiyini bildirdi: “Məhkəmə bazar ertəsi saat 10:30-da davam edəcək. Prosesdə bəzi vəsatətlərim oldu. Yazılı vəsatətim olmadı. Düşünürəm ki, yaxın müddətdə məhkəməni yekunlaşdırmaq olar. Ola bilər ki, gələn həftə məhkəmə istintaqı yekunlaşsın. Çünki şahidlərin dindirilməsi artıq başa çatıb. Mirqədirovun əleyhinə ümumiyyətlə, ifadə yoxdur. Bəzi sübutlarımız var. Qeyd edim ki, ittiham tərəfinin Rauf Mirqədirova qarşı elə bir sübutu yoxdur. Hətta Raufun təqsirini qismən də, dolayısı yolla da olsa, təsbit edəcək bir sübut belə mövcud deyil. Sübutlarımızı məhkəməyə təqdim etmək hüquqlarımız var. Bunları təqdim edəcəyik. Məhkəmədən gözləntimi deyə bilmərəm. Çünki Azərbaycan şəraitində hər hansı bir proqnoz vermək çox çətindir”.

Xatırladaq ki, Rauf Mirqədirov ötən il aprelin 19-da Türkiyədə saxlanılaraq Azərbaycana deportasiya olunub. Həmin gün təyyarə ilə Bakıya göndərilən jurnalisti MTN əməkdaşları saxlayıblar. Onun barəsində Cinayət Məcəlləsinin 274-cü (dövlətə xəyanət) maddəsi ilə həbs-qətimkan tədbiri seçilib.

İl yarım jurnalist həbs müddətinin uzadılması yolu ilə həbsdə saxlanılıb. Jurnalistin ittiham olunduğu ağır maddə üzrə onu ömürlük və ya 15 ilə qədər azadlıqdan məhrumetmə cəzası gözləyir. Yerli və beynəlxalq hüquq təşkilatları onu vicdan məhbusu kimi tanıyırlar. Müdafiə tərəfi R.Mirqədirovun Rusiyanın Gürcüstan və Ukraynada apardığı əməliyyatları yazılarında sərt tənqid etdiyinə görə həbs edildiyini iddia edirlər.