SON DƏQİQƏ

Bu gün - 1 iyul xalq qəhrəmanı Babəkin doğum günüdür.

Emtv.az xəbər verir ki, əslində bu tarix şərti təyin olunmuş bir ad günüdür.

Hətta onun doğulduğu il belə dəqiq bilinmir.

Babəkin doğum tarixi təxminən 795-800-cü illər arası götürülür.

Babəkin uşaqlıq və gənclik illəri haqda çox yazılıb. Onun həyatı barədə roman da var. Hətta haqqında bədii film də çəkilib.

Onun 816-cı ildən 838-ci ilədək 22 il ərzində ərəblərə qarşı mübarizəsi də hər kəsə bəllidir. Ərəblər üzərində dəfələrlə qələbə qazanan Babək, sonda – 837-ci ildə Səhl İbn Sumbatın satqınlığı nəticəsində əsir alınıb Samirə şəhərinə gətirilir.

Xəlifə Mötəsim onu 838-ci il martın 14-də edam etdirir. Babək bu işgəncələri mərdliklə qarşılayır.

Babəkin başını əhalini qorxutmaq üçün Xorasana göndərirlər. Bədənini isə Samirə şəhərində hamının gördüyü yerdə çarmıxa çəkirlər. Onun hazırda məzarı yoxdur.

Bütün bunlara baxmayaraq Babək Azərbaycan tarixində böyük iz qoymuş şəxsiyyət hesab edilir. Ən azı ona görə ki, o, AZADLIQ üçün hər şeyini, hətta doğma oğlunu belə qurban vermişdi.

Cənubi Azərbaycanda yerləşən Bəzz qalasına onun doğum günü ərəfəsində sadə insanların yürüşü keçirilir. İranın ali dövlət nümayəndələri isə buna mane olmağa çalışırlar.

Aysun Əliyev,
Emtv.az