SON DƏQİQƏ

Beynəlxalq Muğam Mərkəzində möhtəşəm "Yaradanlar və yaşadanlar" layihəsi uğurla davam edir.

Emtv.az yerli mətbuata istinadən xəbər verir ki, aprelin 1-də Beynəlxalq Muğam Mərkəzində "Yaradanlar və yaşadanlar" layihəsi çərçivəsində keçirilən konsert bəstəkar, əməkdar incəsənət xadimi, Xalq artisti Ramiz Mirişlinin yaradıcılığına həsr olunmuşdu.

Tədbir Azərbaycan Televiziyası "Mədəniyyət" kanalının və Beynəlxalq Muğam Mərkəzinin birgə layihəsi çərçivəsində, Azərbaycan Respublikası Mədəniyyət Nazirliyinin dəstəyi ilə həyata keçirilmişdi.

Konsertdə Xalq artisti Teyyub Aslanov "Ay qəlbi kövrək", Əməkdar artistlər Almaz Orucova "Bir xumar baxışla", Zakir Əliyev "Süfrə nəğməsi", Azərbaycan Televiziyası və Radiosunun solistləri - Kamilə Nəbiyeva "Həyat söylə sən kiminsən", Sərxan Bünyadzadə "İlk sevgi", Zabitə Əliyeva "Bir könül sındırmışam", Ayşən Mehdiyeva "Nəğməkar qız" və Rövşən Əziz " Küsüb məndən" mahnılarını ifa ediblər.

Konsertin son nömrəsi olan "Sənsən ürəyim " Gülüstan Əliyeva, Almaz Orucova və Ayşən Mehdiyevanın ifasında səslənib.

İfaçıları Xalq artisti Ağacəbrayıl Abasəliyevin bədii rəhbərliyi altında "Səadət" instrumental ansamblı müşayiət edirdi.

Tədbirin aparıcısı əməkdar artist Rəşad İlyasov olub.

Konsert maraqla qarşılanıb və gur alqışlarla sona yetib.

Qeyd edirik ki, Beynəlxalq Muğam Mərkəzində mili ədəbi və mədəni irsin təbliği və inkişafı məqsədi ilə həyata keçirilən tədbirlər və möhtəşəm yaradıcılıq layihələri davam edir.

Nəzrin Abbaszadə
Emtv.az