SON DƏQİQƏ

Bu gün Azərbaycan Dövlət Neft və Sənaye Universitetində (ADNSU) Energetika naziri Pərviz Şahbazovla görüş keçirilib.

Emtv.az yerli mənbələrə istinadən xəbər verir ki, tədbiri giriş sözü ilə açan ADNSU-nun rektoru, professor Mustafa Babanlı Energetika naziri Pərviz Şahbazovu salamlayaraq universitetdə gerçəkləşdirilən işlər barədə ətraflı məlumat verib.

İnsan kapitalının formalaşmasında dövlətə dəstək verilməsinin əhəmiyyətindən söz açan rektor, professor M.Babanlı təhsil strategiyası çərçivəsində bir sıra proqramların həyata keçirildiyini bildirib.

Öz fəaliyyətini bu sənədlərdən götürən ADNSU-nun da ölkənin kadr və enerji potensialını dəstəkləməkdə olduğunu diqqətə çatdıran rektor M.Babanlı hazırda universitetin bir sıra yerli və xarici şirkətlərlə müxtəlif istiqamətlərdə əməkdaşlıq etdiyini vurğulayıb.

Azərbaycan Respublikasının Energetika naziri Pərviz Şahbazov uzun illərdən sonra təhsil aldığı ali məktəbdə olmaqdan qürur hissi duyduğunu bildirib. Azərbaycanın energetika sənayesi üçün uğurlu kadrlar yetişdirən ADNSU-da bu gün də təhsilin keyfiyyətinin yüksəldilməsi istiqamətində aparılan işlərdən xəbərdar olduğunu deyib. Ölkənin energetika, neft və qaz ehtiyatlarından istifadə sahəsində görülən işlərdən və yeni layihələrdən söz açan nazir Pərviz Şahbazov Şahdəniz qaz layihəsinin əhəmiyyətindən danışıb. Hazırda Azərbaycanın iqtisadi yüksəliş dövrü yaşadığını qeyd edən nazir P.Şahbazov ölkənin neft-qaz və enerji sektorunda gedən inkişafdan danışıb.

Sevinc Əlimova
Emtv.az
Paylaş.