SON DƏQİQƏ

Ermənistanın Baş naziri Nikol Paşinyan Azərbaycan və Dağlıq Qarabağ münaqişəsi ilə bağlı kəskin bəyanatlar verəndə onun tam məğzini düşünmədən danışır.

Emtv.az xəbər verir ki, bunu sonxeber.az-a Milli Məclisin deputatı Azər Badamov N. Paşinyanın Düşənbədə Azərbaycan Prezidenti İlham Əliyevlə söhbətdən öncəki aylar ərzində kəskin, görüşdən sonra isə yumşaq açıqlamalar verməsinə münasibət bildirərkən deyib.

Paşinyan İlham Əliyev qarşısında heç vaxt duruş gətirə bilməz.

Onun sözlərinə görə, əgər N. Paşinyan əsl siyasətçi olsaydı və beynəlxalq hüququn tələblərini bilsəydi, heç vaxt sərsəm açıqlamalar verməzdi: "Paşinyan Prezident İlham Əliyev ilə görüşəndə isə artıq canlı olaraq qarşısında Azərbaycanın böyük bir Prezidentini görür. Prezident İlham Əliyev böyük bir siyasətçi və diplomatdır. Ona görə də Paşinyan heç vaxt Azərbaycan Prezidenti qarşısında duruş gətirə bilməz və hansısa kəskin ifadə işlədə bilməz".

Paşinyan Azərbaycan Prezidenti qarşısında yumşaldı

Millət vəkili qeyd edib ki, Ermənistanın Baş naziri Azərbaycanın dövlət başçısı qarşısında yumşaldı və Prezident İlham Əliyevin dedikləri ilə tam razılaşdı: "Paşinyan xahiş etdi ki, Ermənistan-Azərbaycan sərhədində və qoşunların təmas xəttində atəşkəs rejimi möhkəmləndirilsin. Təbii ki, bu, Azərbaycan Prezidentinin Paşinyana verdiyi müvəqqəti şansdır. Paşinyan başa düşməlidir ki, Ermənistanın gələcəyi Azərbaycanla sülh müqaviləsinin imzalanmasından və işğal etdiyi Azərbaycan torpaqlarının azad edilməsindən keçir".

Azərbaycan ordusu 48 saat ərzində Qafqazı nəzarətə götürə bilər

A.Badamov hesab edir ki, bu baxımdan Prezident İlham Əliyev N.Paşinyana imkan verdi ki, daxildə Koçaryan və Sarkisyanları sakitləşdirə bilsin: "Paşinyan daxildə öz mövqeyini gücləndirdikdən sonra Dağlıq Qarabağ münaqişəsi ətrafında sülh danışıqlarının aparılmasında tam şəkildə hazır olacaq. Onun başqa bir yolu yoxdur, çünki bu gün Ermənistanın qarşısında güclü Azərbaycan ordusu dayanıb. Hətta NATO-nun hesabatlarında qeyd olunub ki, Azərbaycan ordusu 48 saat ərzində Qafqazı nəzarətə götürə bilər. Paşinyan belə bir güclü ordunun və onun Ali Baş Komandanı qarşısında təbii ki, yumşalmalı və sərsəm ifadələr işlətməməlidir".

Paşinyan gördü ki, Azərbaycanın Prezidenti böyük mədəniyyət sahibidir

Deputat Prezident İlham Əliyevlə N. Paşinyanın təkbətək söhbətləşməsinin önəmini də vurğulayıb: "Təkbətək, üzbəüz görüşlər ona görə razılaşdırılır ki, prezidentlər, dövlət başçıları bir-biriləri ilə birbaşa təmas qursunlar, hansı intellekt sahibi olduqlarını bilsinlər və qərarlar qəbul etsinlər. Paşinyan gördü ki, Azərbaycanın Ali Baş Komandanı böyük intellekt və mədəniyyət sahibidir, böyük diplomatdır. Düşünürəm ki, bundan sonra Ermənistanın Azərbaycana qarşı siyasətində müəyyən dəyişikliklər baş verəcək. İşğal edilmiş torpaqlarımızın azad edilməsinə dərhal nail olunacağını demək bir az çətindir. Çünki orada da bu istiqamətdə Paşinyana qarşı çevrilmiş qüvvələr var. Həmişə Ermənistanda bu kartdan istifadə olunub. Fikrimcə, məsələ yavaş-yavaş öz həllini tapacaq".

Seymur Rəhimov
Emtv.az