SON DƏQİQƏ

Azərbaycan və Rusiya prezidentlərinin görüşündə əsas müzakirə mövzusu Dağlıq Qarabağ məsələsinin tənzimlənməsi olacaq.

Emtv.az xəbər verir ki, Rusiya Prezidenti Vladimir Putinin Azərbaycana səfərini şərh edən sabiq dövlət müşaviri Qabil Hüseynli deyib. Politoloq budəfəki danışıqların açıq xarakter daşıyacağını bildirib:

“Azərbaycan Cənubi Qafqazda Rusiyanın maraqlarına ən çox cavab verən və Moskva ilə bərabərhüquqlu münasibətləri yüksək səviyyədə inkişaf etdirən yeganə ölkədir. Bu baxımdan da Azərbaycan Rusiyanın ölkəmizə olan münasibətindən çox şey gözləyir. Rusiya Minsk Qrupunun həmsədri və regionda maraqları olan bir ölkə kimi Ermənistanın Azərbaycana təcavüzünün nəticələrinin aradan qaldırılmasında münsif rolunu oynamalıdır. Bakının açıq, birmənalı mövqeyinin Moskvanın nəzərinə çatdırılacağını düşünürəm. Hazırda Bakının bütün siyasi səyləri buna yönəlib, bunun üçün də Moskva ilə dostluq, strateji əməkdaşlıq münasibətləri göz önündə saxlanılır. Bu fonda Gömrük İttifaqı, Avrasiya İqtisadi Birliyi, hətta ola bilsin KTMT-yə daxil olmaqla bağlı təklifləri də nəzərdən keçirə bilərik. Hesab edirəm ki, Bakının açıq, birmənalı mövqeyi tezliklə Moskvanın nəzərinə çatdırılacaq”.

Politoloq qeyd edib ki, sülh danışıqları nəticə verməsə, Azərbaycan öz ərazi bütövlüyünü əlində olan vasitələrlə həyata keçirəcək:

“Azərbaycanın vaxtı çox deyil. Ermənistanın destruktiv mövqeyi Bakıya başqa yol qoymur. Soçidə liderlərin ikitərəfli görüşündə Dağlıq Qarabağ məsələsi müzakirə edilsə də, Bakı danışıqlarında Dağlıq Qarabağ məsələsi ilə bağlı bütün kartlar açılacaq. Çünki Rusiya da Azərbaycanın iqtisadi və siyasi əhəmiyyətini anlayır”.

Qeyd edək ki, Rusiya Prezidenti Vladimir Putin sentyabrın 25-də Azərbaycana səfər edəcək.

Seymur Rəhimov
Emtv.az