SON DƏQİQƏ

Ermənistanın baş naziri Nikol Paşinyan İrəvanın meriyası funksiyasını yerinə yetirən Ağsaqqallar Şurasına seçkilər kampaniyası çərçivəsində keçirilmiş mitinqdə emosiyalarına hakim ola bilməyib.

Emtv.az xəbər verir ki, o, dünən yayılmış qalmaqallı səs yazısından bəhs edib.

Dünən Ermənistanın Milli Təhlükəsizlik Xidmətinin rəhbəri Artur Vanesyanla Xüsusi İstintaq Xidmətinin sədri Sasun Xaçatryanın telefon danışığının səs yazısı yayılıb.

Söhbətin mövzusu Ermənistanın sabiq prezidenti Robert Köçəryanın dindirlməsi, habelə MDB-nin Kollektiv Təhlükəsizlik Müqaviləsi Təşkilatının (KTMT) baş katibi, general Yuri Xaçaturova qarşı ittiham və onun həbsidir.

A.Vanesyan hakimə R.Köçəryanın həbsi barədə hökm çıxarmağı əmr etdiyini deyib.

Daha sonra o, söyləyib: “Mənə bax, Yuri Xaçaturova toxunma. O, KTMT-nin rəhbəridi. Ara, ruslarla yenicə barışmışam. Onu tutsaq, biabır olacağıq. Baş nazir deyir tut onu, bas içəri. Ruslarsa dəridən-qabıqdan çıxırlar ki, Xaçaturov tutulmasın. Onu tutma, ölkəni tərk etməməklə bağlı iltizam al, bəsidir”.

A.Vanesyan səs yazısının gerçək olduğunu dünən təsdiqləyib.

Paşinyan isə mitinqdə çox qəzəbli idi.

“Ölkənin xüsusi xidmət orqanlarının danışıqlarının gizli şəkildə dinlənilməsi xəyanət, dövlətçiliyə qarşı cinayətdir. Milli Təhlükəsizlik Xidmətinə və polisə tapşırmışam ki, bunu edənlər ən qısa müddətdə tapılsın, ən sərt məsuliyyətə cəlb olunsun. Bütün bu “xüsusi xidmət”lər və qanunsuz silahlı qruplaşmalar aşkarlanacaq, məhv ediləcək”, – Nikol Paşinyan söyləyib.

O, Ermənistanın MTX-nə və polisə oliqarxlarla yüksək rütbəli məmurların mühafizə xidmətlərinə qarşı reydlər keçirilməsini də əmr edib: “Bu üzdəniraq “mühafizəçilər”i asfalta sərib tərk-silah edin. İki saat sonra Artur Vanesyan və polis rəisi Valri Osipyan görülən işlər, əldə olunan nəticələr barədə məlumat verməlidir. Kimsə məsuliyyətdən yayınmamalıdır. MTX-dən və polisdən bütün Ermənistanda qayda-qanunun bərqərar edilməsini tələb edirəm. Görsəm ki, bacarmırlar, mən bilirəm nə edəcəyəm. Yenə kamuflyaj geyinəcəyəm, Ermənistanda qayda yaradacağıq. Evbəev, küçəbəküçə…”

Seymur Rəhimov
Emtv.az