SON DƏQİQƏ

İraq baş naziri Heydər əl İbadi İran dəstəkli hərbi qruplaşma olan “Həşdi Şəbi”nin lideri Falih əl Fəyyadı vəzifədən azad edib.

Emtv.az xəbər verir ki, İbadi Falih əl Fəyyadı siyasi məsələlərdə tərəf tutduğu üçün vəzifəsindən azad etdiyini açıqlayıb.

Baş nazirin yaydığı bəyanatda əl Fəyyadın təhlükəsizlik və kəşfiyyat qanunlara tabe olmadığı bildirilir.

Açıqlamada 62 yaşındakı əl Fəyyadın həmçinin milli təhlükəsizlik müşavirliyi vəzifəsinə də son verildiyi qeyd olunub.

“Həşdi Şəbi” iraqlı şiələrin dini lideri Əli Sistaninin müraciətindən sonra, 2014-cü ildə təşkil olunub. Adı çəkilən hərbi qruplaşma İranın dəstəyi ilə qurulub. Qruplaşmanın adı bir çox terror aktlarında da hallanır. Nüfuzlu Beynəlxalq Amnistiya təşkilatının hesabatlarında “Haşdi Şəbi”nin adı müharibə cinayətlərində keçir. Bütün bunlara baxmayayaraq İraq hökuməti “Haşdi Şəbi”nin ölkə siyasətinə nüfuz etməsinə imkan verdi. Həmçinin, “Haşdi Şəbi” qruplaşması ölkənin rəsmi ordusu səviyyəsinə gətirildi.

İraqda keçirilən son parlament seçkilər zamanı isə baş nazir İbadi ilə “Haşdi Şəbi” arasında narazılıqlar pik həddə çıxdı. Belə ki, İbadi parlament seçkisində baş nazirin seçki siyahısında olmasına baxmayaraq əl Fəyyadın “Haşdi Şəbi” komandirlərindən olan, “Fəth Koalisiyası”nın lideri Hadi əl Amiri ilə gizli görüşlər keçirdiyini öyrənmişdi.

Seçkilərdə 48 deputatla ikinci yeri tutan “Fəth Koalisiyası”nın lideri və “Haşdi Şəbi” komandirlərindən olan Amiri isə İbadini 2 ay ərzində devirəcəkləri ilə təhdid edir.

Qeyd edək ki, İraq baş naziri Heydər əl İbadi ABŞ-ın İrana qarşı sanksiyalarına dəstək verəcəklərini üstüörtülü şəkildə bəyan etmişdi. İranın İraq siyasətindəki ən təsirli qüvvəsi olan “Haşdi Şəbi” qruplaşması isə buna cavab verəcəklərini açıqlayıb.

Sevinc Əlimova,
Emtv.az