SON DƏQİQƏ

2018-ci ilin 3 ayında Azərbaycana 627 835 nəfər xarici vətəndaş səfər edib.

Emtv.az xəbər verir ki, Mədəniyyət və Turizm Nazirliyinin informasiya və ictimaiyyətlə əlaqələr şöbəsindən mətbuata verilən məlumata görə, bu, 2017-ci ilin müvafiq dövrü ilə müqayisədə 70 207 nəfər və ya 12.6% artım deməkdir. Xarici vətəndaşların 185 913 nəfəri yanvar, 166 161 nəfəri fevral, 275 761 nəfəri isə mart ayında ölkəmizə gəlib.

Ölkəmizə səyahət edən xarici vətəndaşların sayına görə ənənəvi olaraq, Rusiya Federasiyası (171 814 nəfər), Gürcüstan (138 909 nəfər), İran İslam Respublikası (99 158 nəfər) və Türkiyə (72 733 nəfər) ilk sıradadır. Bununla yanaşı, BƏƏ (29 317 nəfər), Ukrayna (11 847 nəfər) və İraq (11 112 nəfər) vətəndaşları da Azərbaycana gələnlərin sırasında seçilib.

2018-ci ilin 3 ayı ilə keçən ilin müvafiq dövrünü müqayisə etdikdə xüsusi artım tempinə görən seçilən ölkələr Gürcüstan (15 684 nəfər və ya 12.7%), Rusiya Federasiyası (11 188 nəfər və ya 6.97%), Türkiyə (8 191 nəfər və ya 12.7%), BƏƏ (6 931 nəfər və ya 31%) və Küveyt (5 621 nəfər və ya 614%) olub.

2018-ci ilin 3 ayı ərzində Azərbaycana səfər edən xaricilərin əsas hissəsi MDB ölkələri və Gürcüstan (342 457 nəfər və ya 54.5%), Fars körfəzi və Yaxın şərq ölkələri (166 976 nəfər və ya 26.5%) və Avropa ölkələrinin (93 122 nəfər və ya 14.8%) payına düşüb.

3 ay üzrə sözügedən hər üç regiondan ölkəmizə gələnlərin sayında keçən illə müqayisədə artım baş verib. Belə ki, MDB ölkələri və Gürcüstan region üzrə 28 560 nəfər (9.0%), Fars körfəzi və Yaxın şərq ölkələri üzrə 23 022 nəfər (15.9%) və Avropa regionu üzrə 8 008 nəfər (9.4%) artım müşahidə edilib.

Emtv.az