SON DƏQİQƏ

Qüdrət Minhacoğlunun əsərlərindəki məzmun bitkinliyi, fikirlərin səlis ifadə olunması, daima maraq doğuran yazı üslubu, məna ardıcıllığı və bir çox digər cəhətlər əsərlərinin oxunaqlı olmasına və sevilməsinə xidmət edir.


Bu gün Azərbaycan Yazıçılar Birliyində görkəmli şair-jurnalist, yazıçı-publisist Qüdrət Minhacoğlunun (Qüdrət Minhac oğlu Hüseynov) son zamanlar çap etdirdiyi bir neçə kitabı ictimaiyyətə, geniş oxucu kütləsinə təqdim olunmuşdur.

Emtv.az xəbər verir ki, tədbirdə Azərbaycanın tanınmış yazarları, şairlər, görkəmli elm və incəsənət xadimləri, o cümlədən də “Esmamedia TV" internet kanalının əməkdaşları da iştirak etmişdilər.

Xüsusi ilə qeyd etmək istəyirik ki, keçirilən tədbirə dəvət alanların sırasında tanınmış jurnalist, özünün könül oxşayan qəzəlləri və şeirləri ilə təkcə ölkəmizdə deyil, həmçinin Azərbaycanın hüdudlarından kənarda da tanınmış şair, yazıçı publisist, "Azərbaycan Bayrağı", Vicdanlı Qələm" və "Heydər Əliyev" mükafatlarının laureatçısı, Faiq Əhmədov da olmuşdur.

Öz həmkarını yubileyi münasibətilə təbrik edən Faiq Əhmədov, qeyd etmişdir bu gün bizim bu tədbirə yığılmağımızın səbəbkarı hamımızın dərin hörmət bəslədiyimiz şair-jurnalist, yazıçı-publisist Qüdrət Minhacoğludur.

Bu gün Qüdrət müəllimin yubileyi ilə yanaşı eyni zamanda da yeni çapdan çıxan kitabları ictimaiyyətə, geniş oxucu kütləsinə təqdim olunur. Xatırlatmaq istərdim ki, cəmi bir neçə gün bundan öncə Qüdrət Minhacoğlu özünün 60 illik yubileyini qeyd edib və mən bir daha bu münasibətlə hamımızın adından Qüdrət müəllimi təbrik edirəm.

Demək istərdim ki, bu gün ömrünün 7-ci onilliyinə qədəm qoymuş Qüdrət müəllim öz yaradıcılığının əsil çiçəklənmə dövrünü yaşamaqdadır. Yaşadığı mənalı ömürün böyük bir hissəsini doğma Azərbaycanımızın rifahına, Vətənin vəsfinə həsr etmiş Qüdrət Minhacoğlu əsl Azərbaycan ziyalısıdır.

Diqqətəlayiq haldır ki, on beşdən çox kitabın müəllifi olan Qüdrət müəllimin yaradıcılığı qonşu ölkələrdə, Rusiyada və qardaş Türkiyədə də maraqla izlənilir. Əbəs yerə deyil ki, o, Azərbaycan Jurnalistlər Birliyi və Azərbaycan Yazıçılar Birliyi ilə yanaşı, həm də Dağıstan Beynəlxalq Yazıçılar İttifaqının, Rusiya Azərbaycanlıları Federal Milli Mədəni Muxtariyyatinin, “İrak Türkmen Edəbiyyatçı ve Yazarlar Birliyi”nin üzvüdür. Qüdrət müəllimin əsərləri isə, “Turan antologiyası”nda, “Avrasya şairləri antalojisi”ndə və dövri mətbuatda müntəzəm çap olunur.

Əminəm ki, Qüdrət Minhacoğlunun bu gün təqdimatında iştirak etdiyimiz yeni kitabları da tez bir zamanda oxucularının rəğbətini qazanacaq. Mən bir daha Qüdrət müəllimi bu münasibətlə hamımızın adından təbrik edirəm və ona yeni-yeni yaradıcılıq uğurları arzulayıram

Tədbirdə iştirak edən Emtv.az saytının və “Esmamedia TV” internet kanalının əməkdaşları Qüdrət Minhacoğlundan və Faiq Əhmədovdan eksklüziv müsahibə almışdılar.

Əməkdaşlarımızın Faiq müəllimlə olan müsahibəsinin yazılı variantını izləyicilərimizə olduğu kimi təqdim edirik.

- Faiq müəllim, bu gün yeni kitabının təqdimatında iştirak etdiyiniz Qüdrət Minhacoğlunun yaradıcılığı sizin üçün hansı cəhətləri ilə daha dəyərlidir?

- Mən tədbirin gedişində etdiyim çıxışımda da vurğuladım ki, Qüdrət müəllim öz əsərlərində daima Azərbaycanı tərənnüm edib, öz oxucularına vətənpərvərlik, milli birlik ideyalarını təlqin etməyə çalışıb. Şəxsən mənim üçün məhz bu cəhətlər hər zaman daha üstün və daha vacib olublar. Eyni zamanda da Qüdrət Minhacoğlunun əsərlərindəki məzmun bitkinliyi, fikirlərin səlis ifadə olunması, daima maraq doğuran yazı üslubu, məna ardıcıllığı və bir çox digər cəhətlər əsərlərinin oxunaqlı olmasına və sevilməsinə xidmət edir.

- Gələcəkdə müəllifin hansı mövzulara daha çox müraciət etməsini istərdiniz?

- Əsərlərindən də göründüyü kimi, Qüdrət Minhacoğlu ən müxtəlif mövzulara müraciət etməkdən çəkinməyən bir yazıçıdır. Başqa sözlə desəm, Qüdrət müəllim hətta indiyədək müraciət etmədiyi hər hansı bir tamamilə yeni mövzunu seçərsə belə, öz oxucusunu maraqlandırmağı, onu cəlb etməyi bacarar. Lakin düşünürəm ki, bu gün bizim daha çox önəm verməli olduğumuz mövzular yenə də vətənpərvərlik, xalqa, torpağa bağlılıq, milli-mənəvi dəyərlərimizin qorunub saxlanması olmalıdır. Çox sevinirəm ki, məhz elə bu istiqamətlər də Qüdrət Minhacoğlunun yaradıcılığında hər zaman əsas, aparıcı xətti müəyyən edirlər.

Hazırladı: GülnarəHəsənova, İlqar Əliyev,
Çəkiliş və Fotolar: Zakir Müslünova məxsusdur.
Emtv.az