SON DƏQİQƏ

Türkiyə prezidenti Rəcəb Tayyib Ərdoğan Sudan səfərinin ikinci günündə paytaxt Hartumdan təyyarə ilə Port Sudan hava limanına gəlib.

Emtv.az xəbər verir ki, burada Ərdoğanı Sudan prezidenti Ömər əl Bəşir qarşılayıb.

Ərdoğan daha sonra Osmanlı imperiyasının Sevakin adasını ziyarət edib.

Türkiyə prezidenti Sevakin adasındakı Osmanlı gömrük binası, Hənəfi və Şafi məscidlərini ziyarət edib, TİKA tərəfindən aparılan bərpa işləri barədə rəsmilərdən məlumat alıb. Ərdoğan burada Hənəfi məscidində namaz qılıb.

Daha sonra çıxış edən Ərdoğan Türkiyə üçün mühüm olan xəbəri verib.

“Sevakin adasını bu halda görmək bizləri kədərləndirdi. Yerlə yeksan ediblər. Kim? Qərb. Qərbin xarakterində bu var. Bu gün Ömər əl Bəşirdən xüsusi xahiş etdim. Bu adanı bizə verin, tamamilə bərpa edək və tarixi şəninə layiq bir vəziyyətə gətirək. Sudan bununla fəxr edər. Hətta turizmdə yeni bir addım atırıq. Nədir o yeni addım? İnşallah, ümrə səyahətləri zamanı bir turizm olar. Tarixdə belə idi, buraya gəlib, buradan Ciddəyə gedilirdi. Yeni yollar inşa edərik.

Əziz qardaşım Ömər Bəşir “tamam” dedi. Buranı inşa etmək nə deməkdir bilirsinizmi? Buranı yerlə bir edənlərə cavab vermiş olacağıq. Sizin buraları darmadağın etməyiniz bizim saqqalımızı təraş etməyə bənzəyir. İndi biz buranı elə inşa edəcəyik ki, kəsilən saqqal çox çox bitər, siz bunu görəcəksiniz. Gerisi var gerisini demirəm” deyə Ərdoğan qeyd edib.

1517-ci ildə Yavuz Sultan Səlimin Misiri fəth ilə türk torpaqlarına qatılan Sevakin adası, 1882-ci ildə Misirin ingilislər tərəfindən işğalından sonra, Osmanlı nəzarətindən çıxdı. 24 iyul 1923-ci il tarixli Lozanna müqaviləsinin 17-ci maddəsi əsasında qəti olaraq ingilis idarəciliyində olan Misirə verildi.

Sudanın 1956-ci ildə müstəqilliyini qazanması ilə adı çəkilən ada Sudan torpaqlarının bir parçası oldu.

Emtv.az