SON DƏQİQƏ

PKK-nın Suriya qolu PYD/YPG-nin bünövrəsini təşkil etdiyi SDQ Bəşər Əsədin “vətən xainləri” ittihamına cavab verib.

Emtv.az xəbər verir ki, terror təşkilatının yaydığı bəyanatda Suriya rejiminə “Xain Əsədin özüdür” cavabı verilib.

Qeyd edək ki, prezident Bəşər Əsəd dünən jurnalistlər qarşısında çıxışında PYD/YPG-ni nəzərdə tutaraq başqa dövlətlərin göstərişi ilə fəaliyyət göstərən qruplaşmaları vətən xaini adlandırmışdı.

Açıqlamalardan sonra əvvəllər araları yaxşı olan rejim və terrorçular arasında rabitə kəsilib.

“Əsəd və tör-töküntülərinin xəyanətdən danışmağa haqqı yoxdur, çünki rejimin özü ölkədə fərqli qruplar formalaşdırmışdır. Bu qruplar xalq və torpağa ziyan vurub. Rejimin özü xarici terrora qapı araladı və həbsxanalardakı terrorçuları azad etdi ki, Suriya xalqının qanını töksünlər” – SDQ-nin bəyanatında belə deyilir.

PYD və Əsəd rejimi Suriyada vaxtaşırı olaraq Rusiya vasitəsilə rabitə saxlayır, birgə hərəkət edirdilər. Əsəd kürdlərə muxtariyyət sözü versə də, belə bir münaqişənin ortaya çıxması maraq doğurur. Ekspertlər bunu Rusiya və ABŞ-ın mövqelərini konkretləşdirməsi ilə izah edirlər.

Qeyd edək ki, Rusiya da daha PYD-nin Soçi sammitində iştirak etməməsi ilə bağlı Türkiyə ilə həmrəy olduğunu bildirmişdi.

Emtv.az