SON DƏQİQƏ

Ermənistan parlamenti oktyabrın 25-də “Müdafiə haqqında” qanun layihəsini ilk oxunuşda qəbul edib. Novator.az xəbər verir ki, layihəyə əsasən, Silahlı Qüvvələrin Baş Qərargah rəisi sülh dövründə müdafiə nazirinə, müharibə vaxtı isə ali baş komandana, yəni baş nazirə tabe olacaq.

Parlamentin 86 deputatı layihənin lehinə, 9-u əleyhinə səs verib.

2018-ci ildə Serj Sərkisyanın prezident səlahiyyətləri başa çatandan sonra Ermənistanda icra hakimiyyəti və dövlət idarəçiliyi sisteminə ümumi rəhbərliyi hökumət həyata keçirəcək, baş nazir əsas fiqur olacaq.

“Müdafiə haqqında” qanun layihəsi təhsilə görə hərbi xidmətdən möhlətin tam ləğvini də nəzərdə tutur.

Azərbaycanın “Hərbi vəzifə və hərbi xidmət haqqında” qanununa əsasən, bakalavriat, magistratura və doktorantura səviyyələrində təhsil alanların hərbi xidmətə çağırışdan möhlət hüququ var. Xarici ölkələrdə oxuyan bakalavr, magistr və doktorantlara, rezidentura (internatura) təhsili alanlara, o cümlədən Azərbaycan prezidentinin müəyyən etdiyi elmi təşkilatda təhsil alan şəxslərə də möhlət hüququ verilir.

Emtv.az