SON DƏQİQƏ

Bakıda müşahidə olunan toz dumanı Türkmənistan ərazisindən daxil olan tozlu küləklə bağlıdır və analizlərin nəticəsinə əsasən, havada tozun həcmi sanitar normadan 20 faiz artıqdır.

Hava şəraiti insan orqanizminə fəsadsız ötüşməyib. İnsanlarda baş gicəllənməsi, qıcıqlanma, halsızlıq kimi əlamətlər özünü büruzə verib.

Toz dumanı insan orqanizmində hansı fəsadlara yol aça bilər?

Tibbi ekspert Adil Qeybulla bildirib ki, havada olan tozun radiaktivliyinə əsasən təhlükə barədə düşünmək olar. Belə ki, toz radiaktiv deyilsə, ətraf üçün təhlükəli deyil. Tozlu hava nəfəs yollarını qıcıqlandıra, orqanizm üçün fəsadlara gətirib çıxara bilər. “Toz-duman qatı xüsusilə, astma xəstəliyi və allergiyası olan insanlarda problemlər yaradır. Gözlərində yaz kataraktası olan insanlara bu cür hava pis təsir edir. Toz hissəcikləri dəridə allergik reaksiyalar da yarada bilər. Tənəffüs yollarında problemi olan insanlar üçün belə hava daha təhlükəlidir. Hamilə qadınlara və uşaqlara da bu cür hava mənfi təsir edir”.

Həkim əlavə edib ki, toz qatının ağciyər xərçənginə səbəb olduğu da deyilir. Bunun üçün də tozun tərkibində hansısa radioaktiv elementlərin, yaxud digər konserogen maddələrin olub-olmadığı müəyyən edilməli, radiasiya fonu öyrənilməlidir.

Adil Qeybulla qeyd edib ki, insanlar yaxşı olar ki, belə havalarda bayırda maskayla gəzsinlər. Evin pəncərələrini bağlı saxlasınlar. Kondisionerlər filterli olduğu üçün onlardan istifadə etmək olar. Bu dövrdə insan orqanizminin, eləcə də heyvanların bu tozla təması nə qədər az olsa, tozun zərərverici təsiri də az olar.

Emtv.az