SON DƏQİQƏ

Xəbər verdiyimiz kimi, Atabəylər məhəlləsində, İstiqlal, Həsən Əliyev küçəsindəki bir neçə binada yenidən qurma və təmir işləri davam edir. Zəroş Həmzəyeva küçəsindəki bir nömrəli binada isə təmir işlərinə başlanılıb.

Emtv.az azərtac-a istinadən xəbər verir ki, Atabəylər məhəlləsində 50 mənzillik 1 və 13 nömrəli binalarda işlər davam etdirilir. Hər iki binanın fasad hissəsində üzləmə işləri başa çatıb, dam örtükləri dəyişdirilib, rabitə və elektrik xətləri yenilənib. Bloklarda da təmir işləri aparılır, pilləkənlərə travertin döşənib. Atabəylər məhəlləsindəki 13 nömrəli binanın zirzəmisi mülki müdafiənin mühəndis texniki normalarının əsaslarına uyğun olaraq təmir edilir.

İstiqlal küçəsində isə indiyədək 6 binada yenidən qurma və təmir işləri aparılıb. Hazırda isə 45 mənzillik 79 nömrəli və 36 mənzillik 113 nömrəli binalarda əsaslı təmir işləri başa çatmaq üzrədir. Elektrik, rabitə, su, qaz xətləri yenisi ilə əvəz edilib, smart-kart tipli qaz sayğacları quraşdırılıb. Hər iki binanın zirzəmisinin torpağı çıxarılıb, mülki müdafiə məqsədi ilə təmir olunub. 113 nömrəli binanın eni 3 metr artırılıb. Binaların ətrafında da abadlıq işləri aparılacaq.

Eyni küçədəki 56 mənzillik 121 nömrəli bina da əsaslı təmir olunur. Hazırda binanın fasad hissəsində suvaq işləri görülür.

Zəroş Həmzəyeva küçəsindəki bir nömrəli binada da bərpa işlərinə başlanılıb. Binanın eni də 3 metr artırılacaq.

Həsən Əliyev küçəsindəki 2 nömrəli binada da yenidən qurma və təmir işləri yekunlaşmaq üzrədir. Binanın eni 3,6 metr artırılıb. Binada su, kanalzasiya, rabitə və elektrik xətləri də yenilənib. Ümumilikdə bütün təmir edilən binalarda giriş qapılar və ətrafdakı pəncərələr yeniləcək, vahid antena sistemi, bloklarda işıqlandırma qurulacaq və binaların ətrafı abadlaşdırılacaq.