SON DƏQİQƏ

Naxçıvan Muxtar Respublikası Ali Məhkəməsi Rəyasət Heyətinin iclası keçirilib. İclasda 2017-ci ilin birinci yarısında muxtar respublika məhkəmələrinin fəaliyyətinin yekunları müzakirə olunub.

Emtv.az azərtac-a istinadən xəbər verir ki, Ali Məhkəmənin sədri Ramiz Süleymanov cari ilin birinci yarısında Naxçıvan Muxtar Respublikasında hüquq institutlarının inkişaf etdirilməsi, məhkəmə orqanlarının fəaliyyətinin müasirləşdirilməsi istiqamətində mühüm addımlar atıldığını bildirib. Hakimlərin fəaliyyətində yeni informasiya texnologiyalarının tətbiq olunması ilə bağlı bir sıra işlər həyata keçirilib, qanunvericilik bazası mütəmadi olaraq təkmilləşdirilib, məhkəmə orqanlarının yeni informasiya-kommunikasiya texnologiyaları ilə təmin olunması məhkəmə sisteminin daha da müasirləşdirilməsinə səbəb olub.

Ali Məhkəmənin sədri Naxçıvan Muxtar Respublikası Ali Məclisinin Sədri tərəfindən imzalanan 15 iyul 2011-ci il tarixli “Naxçıvan Muxtar Respublikasında dövlət orqanlarının elektron xidmətlər göstərməsinin təşkili haqqında” Fərmanından irəli gələn vəzifələrin icrası ilə əlaqədar Naxçıvan Muxtar Respublikasının Ali Məhkəməsində görülən işlər barədə məlumat verib.

Naxçıvan Muxtar Respublikası Ağır Cinayətlər Məhkəməsinin sədri Hüseyn Məmmədov, Hərbi Məhkəmənin sədri Qasım Əliyev, İnzibati-İqtisadi Məhkəmənin sədri Hicran Muradov, Naxçıvan Şəhər Məhkəməsinin sədri vəzifəsini icra edən Əhliman Xıdırov, Şərur Rayon Məhkəməsinin sədri Hüseyn Zülfüqarov, Babək Rayon Məhkəməsinin sədri Səxavət Bəylərli, Ordubad Rayon Məhkəməsinin hakimi Elşən Salmanov və Culfa Rayon Məhkəməsinin hakimi Mehrab Məmmədov məruzə ətrafında çıxış edib, ilin birinci yarısında görülən işlər haqqında məlumat veriblər.

İclasa Naxçıvan Muxtar Respublikası Ali Məhkəməsinin sədri Ramiz Süleymanov yekun vuraraq bildirib ki, Ali Məhkəmə ilin ikinci yarımilində öz fəaliyyətini beşinci çağırış Naxçıvan Muxtar Respublikası Ali Məclisinin altıncı sessiyasında qarşıya qoyulan vəzifələrə uyğun quracaq.

Emtv.az