SON DƏQİQƏ

Qısqanclıq zəminində arvadını öldürməkdə təqsirli bilinən Salyan rayon sakini, 1964-cü il təvəllüdlü Nazim Ağayevin cinayət işi üzrə məhkəmə prosesi başa çatıb

Nazim Ağayev arvadı Mehriban Ağayevanın başqa şəxslə görüşüb və gizli həyat tərzi keçirməsindən şübhələnib. Bununla bağlı ər-arvadın arasında əvvəllər dəfələrlə mübahisələri olub.

Qısqanclıq

Sonuncu dəfə mübahisə edən Nazim Ağayev arvadını qəsdən öldürmək, sonra isə özünə xəsarət yetirərək intihar etmək qərarına gəlib.
Bu məqsədlə Nazim Ağayev hadisədən bir neçə gün əvvəl yazdığı müxtəlif məzmunlu, o cümlədən “Bizi bir qəbirə qoyun, xahiş edirəm, mən onu sevirəm, heç olmasa bu xahişi yerinə yetirin. Oğul, yaxşı oğul. Məni bağışla, məcburam, bu, namus məsələsidir. Aslan içəridən ailəmizi dağıtdı”, - kimi, həmçinin ona məxsus pul vəsaitlərinin miqdarı və yerini özündə əks etdirən yazı olan vərəqləri tərtib edib.

Qətl

Nazim Ağayev daha sonra 17 iyul 2015-ci il tarixdə saat 23 radələrində yaşadığı Binəqədi rayonu, Azadlıq prospekti, məhəllə 3023 ev 1 ünvanında övladlarının evdə olmamasından istifadə edərək öz niyyətini həyata keçirmək üçün mətbəxdən bıçaq götürüb. O, bıçaqla bir dəfə arvadını vuraraq öldürüb.

Nazim Ağayev arvadını öldürdükdən sonra özünü intihar məqsədilə özünə də xəsarət yetirib. Ona tibbi yardım göstərildiyi üçün həyatını xilas etmək mümkün olub.

Nazim Ağayev Cinayət Məcəlləsinin 120.1-ci (qəsdən adam öldürmə) maddəsilə ittiham edilib. Onun barəsində başlanan cinayət işi baxılması üçün Bakı Ağır Cinayətlər Məhkəməsinə göndərilib.

“Oğluma dedim ki, mənə oxşamırsan”

Məhkəmədə ifadə verən Nazim Ağayev bildirib ki, hadisədən bir gün əvvəl evdə 20-22 yaşlı oğlanlarına baxıb və oğlanlarının ona oxşamamasını deyib: “Oğluma dedim ki, Hikmət, sən mənə oxşamırsan, səni DNK analizinə aparacağam. Ertəsi gün ailə üzvlərimə bayramla əlaqədar Quba rayonuna getməyi, bir neçə gün orada qalmağı təklif etdim. Mehribanla Nazim bir maşında, oğlanlarım Aslanla Hikmət isə digər maşına əyləşdilər. Biz yola düşərkən qəfil yağış yağmağa başladı. Aslan rayonda dolu düşəcəyini dedi və Qubaya getməkdən imtina etdi. Bu səbəbdən Qubaya yox, istirahət etmək üçün Novxanıya yollandıq”.

“Arvadım dedi ki, bıçağı ürəyinə soxacam”

Təqsirləndirilən şəxsin ifadəsinə görə, günorta saatlarında Aslanla Hikmət şəhərə qayıdıblar: “Uşaqlar getdikdən sonra Mehriban məndən doğurdanmı Hikməti analizə aparmaq istədiyimi soruşdu. Ona nəinki Hikməti, hətta Aslanı da aparacağını söylədim. Arvadıma dedim ki, şəkər xəstəsiyəm, övladlarıma artıqlaması ilə qayğı göstərirəm, amma onların heç birində mənə qarşı ata məhəbbəti yoxdur. Novxanıdan qayıtdıqdan sonra gecə divanda uzanarkən qəflətən qarın nahiyəmdə ağrı hiss etdim. Mehribanın əlində bıçaq vardı. Əvvəlcə qorxaraq müqavimət göstərmədim. Sonra mətbəxə keçdim, əlimə bıçaq götürərək dəhlizə gəldim. Mehribana dedim ki, dəlisən, məni niyə bıçaqla vurursan? Mehriban bildirdi ki, bıçağı ürəyinə soxacağam”.

“Dedi ki, Aslan və Hikmət sənin oğlun deyil”

Nazim Ağayev qeyd edib ki, Mehribana həbs olunacağını deyib: “Arvadım uşaqların bu barədə heç kimə deməyəcəklərini söylədi. Bıçaq əlimdə qapıya tərəf getmək istədikdə qarşımı kəsdi, geriyə mətbəxə qayıtdıqda ayağım ilişdi, başım tumbaya dəydi. Mehriban dedi ki, qoymaram uşaqları analizə aparasan, ölməmişdən əvvəl bil, Aslan və Hikmət sənin oğlun deyil. Sonra bıçaqla sinə nahiyəmə zərbə endirdi. Bıçaq sinəmdə qaldı. Özümü qorumaq üçün mən də onu vurdum. Mehriban yıxıldı, bıçağı tulladı. Sonradan özüm də yıxıldım, ayılanda gördüm ki, xəstəxanadayam”.

11 il cəza

Bakı Ağır Cinayətlər Məhkəməsinin hökmü ilə Nazim Ağayev 11 il müddətinə azadlıqdan məhrum edilib. Hökmdən narazı qalan Nazim Ağayev apelyasiya şikayəti verib.

Nazim Ağayev cəzasının yüngülləşdirilməsini xahiş edib. Onun şikayəti araşdırılması üçün Bakı Apelyasiya Məhkəməsinə göndərilib.
Apelyasiya şikayəti hakim Faiq Qasımovun sədrliyi ilə keçirilən prosesdə araşdırıb. Hakim heyəti apelyasiya şikayətinin dəlillərini araşdırıb və sonda qərar elan edib.

Qərara görə, Nazim Ağayevin şikayəti təmin edilməyib.

Emtv.az