SON DƏQİQƏ

Azərbaycan və UNESCO arasında əlaqələrin yaradılmasının 25 illiyi münasibətilə UNESCO üzrə Azərbaycan Respublikasının Milli Komissiyasının üzvlərinin iştirakı ilə iclas keçirilib.

XİN-in mətbuat xidmətindən verilən məlumata görə, iclasda fəxri qonaq statusunda UNESCO baş direktoru İrina Bokova iştirak edib.

Xarici işlər naziri, UNESCO üzrə Azərbaycan Respublikasının Milli Komissiyasının sədri Elmar Məmmədyarov iclası giriş sözü ilə açaraq 25 il ərzində Azərbaycanın UNESCO ilə faydalı və məhsuldar əlaqələr qurduğunu qeyd edib. Nazir Azərbaycanın birinci vitse-prezidenti, UNESCO-nun xoşməramlı səfiri Mehriban Əliyevanın fəaliyyəti nəticəsində Azərbaycan–UNESCO əməkdaşlığının keyfiyyətcə yeni mərhələyə qədəm qoyduğunu vurğulayıb. Bu xüsusda o, Azərbaycanın iki maddi mədəniyyət abidəsinin UNESCO-nun Ümumdünya irs siyahısına, səkkiz nominasiyasının UNESCO-nun qeyri-maddi irs siyahısına, bir nominasiyasının isə təcili qorunmaya ehtiyacı olan qeyri-maddi mədəni irs siyahına daxil edildiyi barəsində məlumat verib.

E. Məmmədyarov Azərbaycanın UNESCO-nun dörd komitəsinin fəal üzvü olduğunu, ölkəmizdə UNESCO-nun müxtəlif proqramları üzrə beş milli komitənin fəaliyyət göstərdiyini deyib. O, Azərbaycanın UNESCO-nun donorlarından biri olduğunu qeyd edərək 2013-cü ildə Azərbaycan və UNESCO arasında imzalanmış Çərçivə Sazişinə uyğun olaraq ölkəmizin UNESCO-nun Afrikada qızların təhsili üzrə layihəni maliyyələşdirdiyini diqqətə çatdırıb.

Nazir UNESCO-nun xətti ilə ölkəmizdə çoxsaylı tədbirlərin keçirilməsini təqdirəlayiq hal kimi qiymətləndirib və əməkdaşlığın bundan sonra uğurla inkişaf edəcəyinə əminliyini ifadə edib.

İ. Bokova isə 25 il ərzində Azərbaycan-UNESCO əməkdaşlığının inkişafının məmnunluq doğurduğunu diqqətə çatdırıb. Azərbaycan və UNESCO arasında əlaqələrin hərtərəfli inkişafında Azərbaycanın birinci vitse-prezidenti Mehriban Əliyevanın xüsusi rolunu qeyd edib. O, ölkəmizin UNESCO-nun prinsiplərinə sadiqliyini, təşkilatın məqsəd və məramlarının milli və beynəlxalq səviyyədə təşviq edilməsi, Davamlı İnkişaf Məqsədlərinin həyata keçirilməsi istiqamətində səylərini yüksək qiymətləndirib.

İ. Bokova Bakıda keçirilən və UNESCO-nun da tərəfdaşı olduğu 4-cü Ümumdünya Mədəniyyətlərarası Dialoq Forumunun əhəmiyyətinə toxunaraq, forumda çağdaş dünya üçün aktual mövzuların müzakirə olunduğunu vurğulayıb.

Görüş UNESCO üzrə Azərbaycan Respublikasının Milli Komissiyasının üzvlərinin iştirakı ilə müzakirə və fikir mübadiləsi formasında davam edib.

Emtv.az