SON DƏQİQƏ

Naxçıvan Muxtar Respublikasına səfərimdən çox məmnunam. Səfərim uğurla başa çatdı. Burada mənə göstərilən qonaqpərvərliyə görə minnətdarlığımı bildirirəm. Naxçıvan şəhərinin təmizliyi, buradakı səliqə-sahman, insanların qonaqpərvərliyi məndə xoş təəssürat yaratdı.

Bu fikirləri azərtac-a müsahibəsində Almaniya Federativ Respublikasının Azərbaycan Respublikasındakı fövqəladə və səlahiyyətli səfiri Mixael Kindsqrab bildirib.

O, səfərinin məqsədi barədə danışaraq deyib: “Çox şadam ki, Almaniya Federativ Respublikasının Azərbaycan Respublikasındakı fövqəladə və səlahiyyətli səfiri kimi fəaliyyətə başladığım qısa müddət ərzində Naxçıvana gəlməyə müvəffəq olmuşam. Muxtar respublikaya səfərimin məqsədi Almaniya ilə Azərbaycanın Naxçıvan Muxtar Respublikası arasında iqtisadi, təhsil və mədəniyyət əlaqələrini daha da genişləndirmək idi. Naxçıvanda keçirdiyim yüksək səviyyəli görüşlərdə bu məsələlər ətrafında müzakirələr apardıq”.

Mixael Kindsqrab Azərbaycanın Naxçıvan Muxtar Respublikası ilə Almaniya Federativ Respublikası arasında iqtisadi əlaqələrin gələcək inkişaf perspektivləri barədə danışaraq ümidvar olduğunu bildirib ki, bundan sonra iqtisadi əlaqələrimiz daha da genişlənəcək. “Bu məqsədlə Bakıdakı Alman-Azərbaycan Xarici Ticarət Palatası ilə Naxçıvan Muxtar Respublikasının Bakı şəhərindəki daimi nümayəndəliyi arasında görüşlər keçiriləcək və iqtisadi əlaqələrin genişləndirilməsinin perspektivləri müzakirə ediləcək”, – deyə Almaniya səfiri vurğulayıb.

Emtv.az