SON DƏQİQƏ

Vətəndaşlar icra nümayəndəsi və bələdiyyə sədrindən şikayətçi düşüblər



Yazılı mətbuatda dərc olunmuş “Qala qəsəbəsində aksiyalar gözlənilir” sərlövhəli tənqidi materiallarda Xəzər RİH başçısının Qala qəsəbəsi üzrə nümayəndəsi Məzahir Hüseynovun yarıtmaz fəaliyyətindən doğan müxtəlif fəsadlardan bəhs olunub. Bu materialın dərcindən sonra yerli mətbuat qəsəbə sakinlərinin icra nümayəndəsinin maxinasiyalarına yerli bələdiyyə sədrinin də şərik olduğunu bildirirlər. Qeyd edək ki, mətbuatda bundan əvvəl də daxil olan məlumatlarda Qala bələdiyyəsinin sədri Talıb Babayevin həyata keçirdyi torpaq maxinasiyaları haqda iddialar öz əksini tapmışdı. Bu baxımdan hələ də ciddi problemlərin və böyük çatışmazlıqların olması yeni aldığımız məlumatlarda da təsdiq olunur.

Bildirilir ki, Qala bələdiyyəsinin fəaliyyəti dövrü olaraq ətraf ərazilərdə bir neçə ağac və kol bitkilərinin əkilməsi, məhdud metrajlarda asfalt örtüyünün təzələnməsi ilə məhdudlaşır. Əksər hallarda Talıb Babayev ərazidə təmir bərpa işlərinin, abadlaşdırmanın aparılması, sosial-məişət problemlərinin həlli üçün lazımi vəsaitin olmadığından şikayətlənir. Eyni zamanda həmin məmur elə sakinlərin gözü qarşısındaca gündən-günə varlanır, ev, avtomobil, villa sahibinə çevrilir.

Bütün bu sərvətə sahib olmanın yeganə mənbəyi olaraq isə, mənbələr bələdiyyə sədrinin məhz Məzahir Hüseynovla birlikdə həyata keçirdikləri korrupsiya əməllərini göstərirlər. Artıq qeyd olunduğu kimi icra nümayəndəsi Məzahir Hüseynov bu vəzifəyə 2-3 iı bundan əvvəl təyin olunub. Həm də yerli kadrlardan olmayan bu məmurun təyinatı birbaşa onun Xəzər RİH-nin başçısı Gülağa İslamovla quda olması faktına əsaslanıb. Buna görə də Məzahir Hüseynovun törətdiyi əməllər qəsəbədə nəzərəçarpacaq dərəcədə gərginlik yaranmasına şərait yaradır. Mənbələr tərəfindən xüsusi olaraq vurğulanır ki, Qalada böyük səlahiyyətlərə sahib olan icra nümayəndəsinin razılığı olmadan qəsəbədə bircə qarış belə olsun torpaq alqı-satqısı həyata keçirilə bilməz.

Bildirilir ki, yerli sakinlər pay torpaqların alınması zamanı çox ciddi çətinliklərlə üzləşdikləri halda, kənar şəxslərin bu ərazilərdə torpaq sahələri almağı heç bir problemlə müşayət olunmur. Təbii ki, tələb olunan məbləği ödəmək şərti ilə. Qeyd etmək lazımdır ki, analojı problem Xəzər rayonunun bəzi digər qəsəbələrində də mövcuddur. Məlumatlarda belə bir məqam da öz əksini tapır ki, Məzahir Hüseynovun qazanmaq hərisliyi bu torpaq maxinasiyaları ilə də tam təmin olunmur. Buna görə də icra nümayəndəsi artıq qəsəbədə illər bundan əvvəl salınmış həyət-bacalara da haqq qoymaq iddiasına düşüb. Məlum olduğu kimi bir müddət əvvəl ölkə rəhbərliyi tərəfindən içərisindən çoxdan yaşayış olan, lakin müəyyən səbəblərdən sənədi olmayan evlərin sənədləşdirilməsinə dair müvafiq göstərişlər verilmişdi. Lakin Məzahir Hüseynov ölkə rəhbərliyinin bu göstərişini də özünəməxsus tərzdə həyata keçirməyi planlaşdırıb.

Bu xüsusda aldığımız məlumatlarda bildirilir ki, icra nümayəndəsi sənədsiz evlərin sahiblərini bu evləri uçuracağı ilə hədələyir. Həm də bəzi hallarda bu hədələrin boş olmadığını isbatlamaq üçün həyətlərin hasarlarının bir hissəsini uçurur da. Ev sahiblərinə isə küçədə qalmamaq üçün təcili sənəd almaq “tövsiyyə” olunur. Ən maraqlısı da budur ki, təklif olunan sənədlərin müqabilində Məzahir Hüseynov ev sahiblərindən 2-3, bəzən isə hətta 5 min manat pul tələb edir. Yeni aldığımız məlumatlarda mənbələr məhz bələdiyyə sədri Talıb Babayev tərəfindən icra nümayəndəsi üçün “sənədləşmə əməliyyatına” cəlb olunası sakinlərin siyahısının tərtib olunduğunu vurğulayırlar.Bizə olunan müraciətləri nəzərə alaraq bir daha qeyd etmək istəyirik ki, qəsəbə sakinləri bir müddət əvvəl Məzahir Hüseynovu onun bu əməllərindən Xəzər RİH-nin başçısı Gülağa İslamova şikayət edəcəkləri barədə xəbərdarlıq ediblər. Lakin başçı ilə qohumluq əlaqələrinə güvənən icra nümayəndəsi belə xəbərdarlıqlara heç bir məhəl qoymur...