SON DƏQİQƏ

Milli Məclisin bu gün keçirilən plenar iclasında çıxış edən millət vəkili Zahid Oruc Respublika Baş Prokurorluğunun nəzdindəki təhlükəsizlik orqanlarına nəzarət edən qurumun və sabiq milli təhlükəsizlik naziri Eldar Mahmudovun fəaliyyətini kəskin tənqid edib.

"EMTV.az" Publika.az-a istinadən xəbər verir ki, deputat bildirib ki, parlamentin hansısa güc strukturlarına, hüquq-mühafizə orqanlarına nəzarət etmək funksiyası yoxdur: "Ancaq Baş Prokurorluqda təhlükəsizlik orqanlarının fəaliyyətinə nəzarət edən qurum var. Bu qurum, görəsən, indiyə qədər hansı fəaliyyətlə məşğul olub? Bu qurum, görəsən, zamanında MTN ətrafında baş verən hadisələrdən niyə məlumatsız olub? Ona nəzarət edibmi? Əslində bu qurumun bir fəaliyyəti də elə bundan ibarət olmalıdır. Ümumiyyətlə, bir çox nazirliklərin təhlükəsizlik, istintaq qurumları da var. Artıq zaman gəlib ki, həmin qurumlar ləğv edilsin”.

Deputat həmçinin deyib ki, dini ekstremizmlə bağlı mübarizə aparmaq üçün dini ayinlər zamanı ianələrin ləğv edilməsi vacibdir: "Nardaranda aşura zamanı ianələr, nəzirlər yığılır. Yığılan vəsaitlər Nardaran üçün hansı işlərə sərf edilib? Əlbəttə edilməyib. Deməli, həmin vəsaitdən silahlanmaya sərf edilə bilər. Belə halların qarşısının alınması üçün yeni hazırlanan qanuna maddə əlavə etmək lazımdır".