17:55 - Vətəndaşların Sosial İmkanlarının Müzakirəsi Regionlarda Davam Edir - Fotolar
20:20 - Regionlarda Növbəti İctimai-Sosial Müzakirələr Başladı –Fotolar
19:44 - Həssas əhali qruplarına ünvanlanmış sosial-humanitar siyasət təbliğ olunacaq-Fotolar
20:51 - Heydər Əliyevin anadan olmasının 100 illiyi çərçivəsində 2 mindən çox ağac əkilib-FOTOLAR
19:35 - Naxçıvanda “Heydər Əliyev və vətəndaş cəmiyyəti quruculuğu” mövzusunda konfrans keçirilib-FOTOLAR
16:46 - Aygün Əliyeva: "2022-ci ili Qurumun Fəaliyyətinin İlk İli Kimi Xarakterizə Edə Bilərik" - Müsahibə
20:17 - Təşkilat sədri Faiq Əhmədov cənab Prezident İlham Əliyevə Açıq Məktub göndərib!
00:21 - “Azərbaycan Sosial Dövlətə Doğru” Layihəsinin Növbəti Tədbiri - Fotolar
19:29 - Xaçmazda tədbir
Naxçıvanda şahmat müəllimlərinə sertifikatlar təqdim olunub
Martın 5-də Naxçıvan Şahmat Mərkəzində Naxçıvan Muxtar Respublikası Təhsil Nazirliyi və Şahmat Federasiyası tərəfindən sertifikasiya imtahanlarında uğurlu nəticə əldə edən müəllimlərə sertifikatların təqdimatı olub.
Emtv.az yerli mətbuata istinadən xəbər verir ki, bu münasibətlə keçirilən tədbirdə çıxış edən Naxçıvan Muxtar Respublikası Şahmat Federasiyasının sədri Seymur Talıbov deyib ki, muxtar respublikada bütün sahələrlə yanaşı, şahmatın da inkişafı daim diqqət mərkəzindədir. Şəhər və rayonlarda şahmat məktəbləri tikilib istifadəyə verilib, orta məktəblərdə şahmat dərsləri tədris olunur. Şahmat Federasiyası Təhsil Nazirliyi ilə birgə orta məktəblərdə şahmatın yüksək səviyyədə tədris olunması üçün sertifikasiya imtahanları keçirib.
Seymur Talıbov diqqətə çatdırıb ki, şahmatın inkişafı Naxçıvan Muxtar Respublikası Ali Məclisinin Sədri tərəfindən daim diqqətdə saxlanılır. Bunun nəticəsidir ki, Ali Məclis Sədrinin tapşırığına əsasən, Naxçıvan Muxtar Respublikası Ali Məclisinin Sədri yanında Dövlət Qulluğu Məsələləri üzrə Komissiyada müəllimlərin nəzəri imtahanı ödənişsiz aparılıb. Bu da muxtar respublika rəhbərinin şahmatın inkişafına böyük önəm verdiyinin bariz nümunəsidir. Şahmat idman növü olmaqla yanaşı, həm də uşaqların zehni inkişafında mühüm rol oynayır. Ona görə də müəllimlər orta məktəblərdə uşaqlara şahmatın sirlərini daha dərindən öyrətməyə çalışmalı, maarifləndirmə işləri aparmalı və idmanın bu növünü təbliğ etməlidirlər. Federasiya sədri bu yolda şahmat müəllimlərinə uğurlar arzulayıb.
Tədbirdə çıxış edən Naxçıvan Muxtar Respublikasının təhsil naziri Rəhman Məmmədov qeyd edib ki, muxtar respublikada Şahmat Mərkəzi və məktəblərinin maddi-texniki bazası yaxşılaşdırılıb, bu məktəblər 67 müasir kompüter və 9 elektron lövhə, həmçinin şahmatla bağlı elektron tədris vəsaitləri ilə təchiz olunub. Eyni zamanda, ümumtəhsil məktəblərində şahmatın tədrisi üçün siniflər ayrılıb, ümumilikdə, ümumtəhsil məktəblərinə 490 ayaqlı, 500 asma və 3910 stolüstü şahmat dəsti verilib. Hazırda muxtar respublikanın ümumtəhsil məktəblərinin I-IX siniflərində dərsdənkənar məşğələlər hesabına 2923, şahmat məktəblərinin dərnək məşğələləri hesabına 2797 olmaqla, ümumilikdə, 5720 saat şahmat fənni tədris edilir. Ümumtəhsil məktəblərində şahmatın tədrisi ilə 445 müəllim məşğul olur.
Rəhman Məmmədov vurğulayıb ki, təhsil müəssisələrində şahmatın tədrisinin yaxşılaşdırılması və müəllimlərin peşəkarlıq səviyyəsinin yoxlanılması məqsədilə Təhsil Nazirliyi və Şahmat Federasiyasının birgə təşkilatçılığı ilə sertifikasiya imtahanları keçirilib. Sertifikasiya iki mərhələdə aparılıb, Naxçıvan Muxtar Respublikası Ali Məclisinin Sədri yanında Dövlət Qulluğu Məsələləri üzrə Komissiya tərəfindən müəllimlərin nəzəri, Təhsil Nazirliyi və Şahmat Federasiyası tərəfindən isə təcrübi bilikləri yoxlanılıb. Müəllimlərdən 401-i imtahanı uğurla keçib, onlardan 25-i sertifikasiya imtahanlarında ən yüksək nəticə göstərib.
Sonra Naxçıvan Muxtar Respublikası Şahmat Federasiyasının sədri Seymur Talıbov və təhsil naziri Rəhman Məmmədov Naxçıvan şəhəri üzrə 9, Şərur rayonu üzrə 5, Ordubad rayonu üzrə 4, Culfa rayonu üzrə 2, Kəngərli rayonu üzrə 2, Şahbuz rayonu üzrə 2 olmaqla, ümumilikdə, imtahanlarda yüksək nəticə göstərmiş 25 müəllimə sertifikatları təqdim ediblər.
Həmin gün imtahandan keçən digər müəllimlərə də muxtar respublikanın rayon təhsil şöbələri və şahmat məktəbləri tərəfindən sertifikatlar verilib.
Nəzrin Abbaszadə
Emtv.az