SON DƏQİQƏ

Bu gün Bakı Ağır Cinayətlər Məhkəməsində dövlət sərhədini qanunsuz keçmə, sənədləri saxtalaşdırmaqda və oğurluqda təqsirləndirilən Yusub Fərid Rəhim oğlunun məhkəməsi keçirilib.

Emtv.az yerli mətbuata istinadən xəbər verir ki, hakim Cavid Hüseynovun icraatında olan prosesdə şahidlər ifadə verib.

Şaban Hüseynov deyib ki, bu iş üzrə təqsirləndirilən Pənah Dadaşovu Gürcüstana aparıb: "Yusub Fəridi isə tanımıram".

Digər şahidlər də ifadə verərək bundan öncəki məhkəmə üzrə məkhum olunduqlarını bildiriblər və əlavə ediblər ki, Gülnarə Şəkinskayaya uşaqlarını ölkədən çıxarmaqda kömək ediblər.

Daha sonra zərərçəkmiş E.Şəkinskinin vəkili çıxış edərək müvəkkilinin şikayətçi olmadığını, Fərid Yusubu bağışladığını bildirib. Hakim deyib ki, zərərçəkmiş bununla bağlı növbəti prosesdə məhkəməyə yazılı ərizə təqdim etməlidir. Proses martın 15-də davam etdiriləcək.

Təqsirləndirilən F. Yusub Daxili İşlər Nazirliyinin Nəqliyyatda Baş Polis İdarəsinin rəisi, general-mayor Emin Şəkinskinin keçmiş qaynıdır.

Bundan öncə bu işlə bağlı bir neçə şəxs ittiham olunaraq onlara hökm oxunub.

E.Şəkinskinin keçmiş həyat yoldaşı Gülnarə Şəkinskaya onun evindən 60 min manat pul oğurlamaqda ittiham olunaraq axtarışa verilib. G.Şəkinskaya, eləcə də onun övladları - Həmidə, Məryəm, Nadiya və Cəvahir Şəkinskayalar dövlət sərhədini qanunsuz keçiblər.

Onlara bu işdə kömək edən - Pənah Dadaşov, Namiq Camalov, Raqub İsbəndiyarov, Zeynəb Cəfərova, Şəfiqə Bağırova, Saçlı Həsənova, Pərvin Dadaşov, Rəvanə Dadaşova, Tahir Hüseynov, Günel Hüseynova, Adəm İsgəndərov və Ənnab İsgəndərovun məhkəməsi yekunlaşıb.

Bakı Ağır Cinayət Məhkəməsinin hökmü ilə N.Camalov 8 il müddətinə azadlıqdan məhrum edilib. Digər şəxslərdən Pənah Dadaşov və Raqub İsbəndiyarova 3 il, qalanlarına isə şərti cəza verilib.
Həmin zaman cinayət işində adları hallanan G.Şəkinskaya, onun qardaşı F.Yusub və Azərbaycan Miqrasiya Mərkəzinin rəhbəri Əlövsət Əliyev barəsində axtarış elan olunub.

F.Yusubun cinayət işində zərərçəkmiş kimi general Şəkinski tanınıb.

Nəzrin Abbaszadə
Emtv.az