SON DƏQİQƏ

1992-ci il fevralın 25-dən 26-na keçən gecə erməni təcavüzkarları Azərbaycanın Xocalı şəhərində bəşəriyyət tarixində ən qanlı faciələrlə bir sırada duran soyqırımı törətdilər. Bu faciədən 26 il keçir. Həmin kütləvi qırğın nəticəsində 106-sı qadın, 63-ü uşaq, 70-i qoca olmaqla 613 nəfər amansızlıqla qətlə yetirildi, 487 nəfər şikəst oldu, 1275 dinc sakin girov götürüldü, onlardan 150 nəfərin taleyi hələ də məlum deyil.

Bu soyqırımı aktı nəticəsində 8 ailə tamamilə məhv edildi, 25 uşaq hər iki valideynini itirdi. Hər il dünya azərbaycanlıları və ədaləti uca tutanlar Xocalı soyqırımı qurbanlarının xatirəsini yad edirlər.

Hər il olduğu kimi bu ildə Azərbaycan paytaxtının minlərlə sakini Xocalı soyqırımının 27-cı ildönümü ilə əlaqədar anım mərasimində iştirak etmək üçün fevralın 26-da səhər tezdən Xətai rayonunda faciə qurbanlarının xatirəsinə ucaldılmış abidənin önünə toplaşmıdılar.

Emtv.az xəbər verir ki, "Azərbaycanın Səsi" İctimai Birliyinin Sədri, "Müstəqil-Lider" jurnalının baş redaktoru, tanınmış yazar, şair Məşədi Faiq Əhmədov da anım mərasimində iştirak etmişdir.

Nəzərinizə çatdırırıq ki, tədbirdə iştirak edən "EsmaMedia" TV-internet kanalının və Emtv.az saytının əməkdaşları da bu fürsətdən yararlanaraq, “Azərbaycanın Səsi” İB-in sədri Faiq müəllimdən faciəvi gün barədə qıssa müsahibə götürmüşdülər.

İctimai Birliyin sədri Faiq müəllimdən götürdüyümüz həmin video-müsahibəni olduğu kumi izləyicilərimizə təqdim edirik.

- Faiq müəllim, biz adətən “Azərbaycanın Səsi” İctimai Birliyinin bu kimi tədbirlərdə daha çoxsaylı heyətlə təmsil olduğunu görmüşük. Bu gün isə, Sizi sadəcə üçlükdə görürük. Bu bir təsadüfmüdür, yoxsa bugünkü proqram elə bu cür də tərtib olunub?

- Əslində bu günə “Azərbaycanın Səsi” İctimai Birliyi tərəfindən heç bir tədbir planlaşdırılmayıb. Bilirsiniz, bu gün min-bir ağrı-acı ilə 27-ci il dönümünü qeyd etdiyimiz Xocalı soyqırımı o qədər böyük bir faciədir ki, onun həqiqi miqyaslarını olduğu kimi dərk etmək və ən əsası da dünyaya dərk etdirmək üçün ayrılıqda heç bir qurum və ya təsisatın imkanları kifayət etməz. Bunun üçün yalnız ümumxalq aksiyasına qatılmaq, xalqın dərdini, hüznünü bölüşmək və paylaşmaq gərəkdir. Bu səbəbdən də biz qərara gəldik ki, bu gün “Azərbaycanın Səsi” İctimai Birliyinin üzvləri olaraq deyil, sıradan bir Azərbaycan vətəndaşları kimi bu izdihama qoşulaq, öz səsimizi xalqın səsinə qataq.

- Bununla belə düşünürəm ki, istənilən halda Sizin Xocalı soyqırımı haqda bölüşməyə müəyyən fikirləriniz yox deyil...

- Məlumdur ki, Azərbaycan xalqı son 200 il ərzində davamlı olaraq erməni millətçi-şovinistlərinin, terrorçularının etnik təmizləmə, soyqırım siyasətinə məruz qalmışdır.

Bununla belə, məhz Xocalı soyqırımı tariximizə ən dəhşətli səhifələrdən biri kimi daxil olmuşdur. Azərbaycan xalqı tarixi torpaqlarından qovulmuş, qaçqına, məcburi köçkünə çevrilmiş və bütün bunlar ermənilər tərəfindən kütləvi qırğınlarla müşayət olunmuşdur. Ermənilərin Xocalı şəhərini hədəfə almaqda məqsədləri bir tərəfdən Qarabağın dağlıq hissəsində azərbaycanlılardan ibarət olan, strateji əhəmiyyətli maneəni aradan qaldırmaq idisə, digər tərəfdən də ümumiyyətlə Xocalını yer üzündən birdəfəlik silmək idi. Çünki Xocalı elə bir yaşayış məskəni idi ki, o, Azərbaycan tarixinin qədim dövrlərindən müasir dövrə qədər tarix və mədəniyyət ənənələrini özündə əks etdirirdi.

Erməni işğalından sonra Xocalının maddi mədəniyyət abidələrinin məhv ediliməsi, dünyanın ən qədim məzarlıqlarından sayılan Xocalı qəbiristanlığının darmadağın edilməsi, ermənilərin sadəcə Azərbaycana deyil, bütün dünya mədəniyyətinə qarşı zorakılıq aktıdır.

Və dünya bunu bilməlidir.

Qeyd etmək istərdim ki, bu gün Xocalı soyqırımı barədə əsl həqiqətlərin dünya ictimaiyyətinə olduğu kimi çatdırılmasında Azərbaycan Respublikasının Birinci vitse-prezidenti Mehriban xanım Əliyeva ilə yanaşı, Heydər Əliyev Fondunun vitse-prezidenti Leyla xanım Əliyevanın da misilsiz xidmətləri vardır.

Hesab edirəm ki, bizim borcumuz Xocalı faciəsini yalnız 26 fevral tarixində deyil, hər gün yad etmək, hər gün anmaq lazımdır. Allah şəhidlərimizə rəhmət eləsin!

"Azərbaycanın Səsi" İctimai Birliyinin "İctimaiətlə Əlaqələr Şöbə"sinin müdiri Nəzrin Abbaszadə.
Emtv.az