SON DƏQİQƏ

Xarici İşlər Nazirliyi (XİN) BDU-nun sabiq rektoru Abel Məhərrəmovun oğlu, Azərbaycanın İspaniyadakı səfiri Anar Məhərrəmovun geri çağırılması ilə bağlı mediada yayılan məlumatlara münasibət bildirib.

Emtv.az xəbər verir ki, XİN-in mətbuat xidmətinin rəhbəri Leyla Abdullayeva yerli mətbuata açıqlama verərək, bu məsələyə aydınlıq gətirib.

L.Abdullayeva deyib ki, Azərbaycan Respublikasının Konstitusiyasının 109-cu maddəsinə əsasən Azərbaycan Respublikasının xarici ölkələrdə və beynəlxalq təşkilatlarda diplomatik nümayəndələrini təyin edib, geri çağırmaq Azərbaycan Respublikasının Prezidentinin səlahiyyətlərinə aiddir: “Hal-hazırda Anar Məhərrəmovun geri çağırılması məsələsinə baxılmır”.

XİN rəsmisi həmçinin Anar Məhərrəmovun İspaniyadakı biznesi ilə bağlı məsələyə də münasibətini bildirib: “Bu məsələlər Azərbaycan Respublikasının Dövlət Qulluğu haqqında Qanunu və Korrupsiyaya qarşı Mübarizə Qanununda öz əksini tapıb. Qeyd olunan hüquqi sənədlərə əsasən dövlət qulluqçularına dövlət qulluğu ilə əlaqədar müəyyən fəaliyyət məhdudiyyətləri qoyulur və bu sırada dövlət orqanlarında əlavə ödənişli fəaliyyətlə məşğul olmamaq qeyd olunur. Səfir Anar Məhərrəmovun şəxsi bizneslə məşğul olub-olmadığına gəldikdə isə bizdə bu barədə məlumat yoxdur və bununla bağlı suallar Səfir A.Məhərrəmova ünvanlana bilər”.

İspaniyada keçirilən tədbir ilə bağlı Bakıdan 2 ton ağırlığında diplomatik yükün göndərilməsinin həqiqətə uyğun olub-olmaması və XİN-nin belə bir yükün diplomatik yük olaraq daşınmasına icazə verilməsi ilə bağlı sualı cavablandıran Leyla Abdullayeva həmin tədbirlə bağlı XİN tərəfindən hər hansı diplomatik yükün daşınmasına icazə verilmədiyini deyib.

Aynurə Kərimova,
Emtv.az
Paylaş.