SON DƏQİQƏ

Naxçıvan inkişaf edən bir diyardır. Buranın iqtisadiyyatı ilə tanışlıq zamanı beynəlxalq bank-kredit təşkilatları üçün daha cazibədar olduğunu gördüm.

Emtv.az xəbər verir ki, bu sözləri müsahibəsində Asiya İnkişaf Bankının (AİB) vitse-prezidenti Vençay Janq deyib.

“Mən Azərbaycanın digər yerlərində olsam da, Naxçıvana ilk dəfədir gəlirəm. Səfərim birgünlük olsa da, təəssüratlarım kifayət qədərdir. İlk olaraq burada çox qonaqpərvərliklə qarşılanmağım mənim üçün yaddaqalan oldu”, - deyən Vençay Janq vurğulayıb ki, görməli yerlər Azərbaycanın bu qədim diyarı haqda gözlədiyindən artıq təəssürat yaradıb.

AİB-in vitse-prezidenti deyib: Asiya İnkişaf Bankı ilə Azərbaycan Hökuməti arasındakı əməkdaşlığa gəldikdə, 2006-cı ildən biz “Su Təchizatı və Kanalizasiya İnvestisiya Proqramı” layihəsinə dəstək veririk. Layihənin həyata keçirilməsində Naxçıvan Muxtar Respublikası hökuməti və layihənin icra qrupu arasında çox sıx əməkdaşlıq olub. Nəticədə, bütün işlər nəzərdə tutulmuş vaxtda və ayrılmış büdcə çərçivəsində həyata keçirilib.

“Ümumilikdə, bu layihə bizim üçün çox müsbət bir təcrübə oldu. Onun həyata keçirilməsində biz yerli icra orqanları ilə çox sıx əməkdaşlıq nümunəsi gördük. Onu deyə bilərəm ki, suyun təmizlənməsi üçün ən son texnologiya tətbiq olundu. İnsan sağlamlığı üçün çox qabaqcıl üsulun tətbiqi layihənin digər buna bənzər layihələrdən üstünlüyünü göstərir”, – deyən AİB-in vitse-prezidenti qeyd edib ki, buna görə də AİB olaraq bu layihədən qazandığımız təcrübəni digər yerlərdə də tətbiq etməyə və daha çox insanı ekoloji təmiz su ilə təmin etməyə maraqlıyıq.

Vençay Janq Naxçıvanda ona göstərilən qonaqpərvərliyə və dəstəyə görə bir daha minnətdarlıq edərək deyib: “Mən muxtar respublikada olarkən Azərbaycanda təmiz su ilə bağlı geniş yayılmış bir deyimi də eşitdim. Düşünürəm ki, bir-birinizə “Ömrünüz su kimi uzun olsun” deməklə ən xoş arzularınızı çatdırırsınız. Bu gözəl kəlam mənim də çox xoşuma gəldi və onu Naxçıvanda keçirilən tədbirdə iştirakçılara Azərbaycan dilində deməyə çalışdım. Təmiz suyun burada yaşayan insanların həyatına rifah gətirəcəyinə inanıram”.

AİB-in Azərbaycan nümayəndəliyinin rəhbəri Nariman Mannapbekov isə vurğulayıb ki, AİB-in vitse-prezidentinin Azərbaycana səfərinin məqsədi 2019-2023-cü illər üzrə Ölkə Tərəfdaşlığı Strategiyasının müzakirə edilməsidir. Hesab edirəm ki, 2014-2018-ci illəri əhatə edən əməkdaşlıq strategiyası uğurla nəticələnib. Biz artıq növbəti beşillik üzrə Ölkə Tərəfdaşlığı Strategiyasının hazırlanmasını, demək olar ki, başa çatdırmışıq. Gələn ilin əvvəlinə hökumətin dəstəyindən sonra biz bu sənədin AİB-in Direktorlar Şurasının müzakirəsinə təqdim edəcəyik.

“Biz hazırda Azərbaycanda bir neçə mümkün maliyyələşmə istiqamətləri üzrə işlər aparırıq. Bunlardan birincisi dövlət investisiya proqramlarına daxil ediləcək yüksəktexnologiyalı və innovasiyalı layihələrin seçilməsidir. İkinci istiqamət 2-3 il və daha çox müddətə kiçik və orta biznesin manatla maliyyələşdirilməsidir. Üçüncü istiqamət dövlət - özəl sektor tərəfdaşlığının inkişafı, dördüncü istiqamət isə dövlət müəssisələrinin effektivliyinin artırılması üzrə əməkdaşlıqdır”, – deyən Nariman Mannapbekov vurğulayıb ki, Naxçıvandan çox xoş və zəngin təəssüratlarla ayrılırlar: “Doğrudan da bu diyarın fərqli təbiəti, tarixi qədimliyi insanı özünə cəlb edir. İnsanların rifah halının yaxşılaşdırılmasına göstərilən qayğı isə hər addımda hiss olunur. Azərbaycanla əməkdaşlıq çərçivəsində muxtar respublika ilə də əlaqələrimizin daha da genişlənəcəyinə inanıram”.

İsmayil İsmayilov
Emtv.az