SON DƏQİQƏ

İsveçin paytaxtı Stokholm şəhərində illərdir fəaliyyət göstərən İsveç-Azərbaycan Kültür Dərnəyi Odlar Yurdu hər il olduğu kimi bu il də Azərbaycanın Milli Müstəqillik gününü oktyabrın 20-də ABF Stokholmda qeyd edib.

Emtv.az xəbər verir ki, bu barədə məlumatı diaspor üzrə araşdırmaçı-jurnalist Elnur Eltürk verib.

Müstəqillik gününə həsr edilmiş tədbiri dərnəyin sədri, Stokholm təhsil idarəsinin ana dili müəllimi Sevinc Nemətova açıb. O, tədbirə gələnləri salamlayıb, müstəqillik günü münasibətilə hamını təbrik edib və müstəqillik haqqında qısa nitq söyləyib. Sevinc Nemətova müstəqillik günü ilə bağlı xatirələrindən danışıb: “Müstəqil Azərbaycan dövlətinin 1918-1920-ci illərdə mövcud olmuş Azərbaycan Xalq Cümhuriyyətinin hüququ varisidir. Bu gözəl günü hər il vətəndən uzaq qürbət ölkədə də qeyd edirik”.

Sevinc Nemətova həm də çıxışında İsveçdə böyüyən azərbaycanlı uşaqlara və gənclərə müstəqillik gününü hər il qeyd etmələrini tövsiyə edib.

Sonda iştirakçılar “Azadlığa gedən yol” sənədli filmini izləyiblər. Filmdəki səhnələr xalqımızın müstəqillik uğrunda apardığı mübarizəni, bu yolda xarici müdaxilələri, dinc əhaliyə olan zülmləri, şərəfli yolda Vətən, torpaq üçün şəhid olanları, ölkəmizin müstəqilliyi, suverenliyi, istiqlaliyyəti uğrunda ziyalılarımızın apardığı qəhrəmanlıqları, siyasət və bacarıqlarını açıq-aşkar, sübut edərək göstərirdi.

Tədbirdə türklərin İsveç Atatürkçü Düşüncə Dərnəyindən də qonaqlar iştirak ediblər.

Bu dərnəyin sədri Mustafa Sönmez Azərbaycanın Müstəqillik gününü təbrik edib O, çıxışında müstəqilliyin mənasından danışıb, türklərin hələ də birlikdə olmamasını xüsusi olaraq vurğulayıb. Dərnəyin sədri Sevinc Nemətova da bildirdi ki, yeni-yeni dərnəkləri açıb, ayrı-ayrı fəaliyyətlər göstərib, həmvətənləri ayırmaqdansa, bütün türklər birləşib birlikdə fəaliyyət göstərərək, çəkici bir zindana vurmalıdırlar.

Tədbirin sonunda Sevinc Nemətov iştirakçılara dərin təşəkkürünü bildirib. Daha sonar müzakirə çay, şirniyyat və meyvə süfrəsi ətrafında davam edib.

İsmayil İsmayilov
Emtv.az