SON DƏQİQƏ

İran telekanallarından birinin idman şərhçiləri “Qarabağ” komandasını lağa qoyublar.

Emtv.az xəbər verir ki, hadisə oktyabrın 3-də “İdman raportu” (Quzariş vərzeşi) televiziya verilişində baş verib.

Videoda göründüyü kimi, iki aparıcı “Qarabağ” komandasının adı və Azərbaycandan bir komandanın Avropa Liqasında iştirak etməsinə gülür.

Məhəmmədrza Əhmədi ““Arsenal” cümə axşamı günü “Qarabağ”la oynayacaq” deyərək gülür. Digər aparıcı Rza Cavdani isə ““Arsenal” hara ilə oynayacaq?” deyərək söhbətə qatılır.

“Qarabağ” komandası ilə bağlı bir neçə cümlə danışan iki aparıcı canlı verilişdə Azərbaycana qarşı nifrətlərini bu şəkildə nümayiş etdiriblər.

Axar.az saytı isə xəbər verir ki, “Qarabağ”- “Arsenal” qarşılaşmasını izləməyə gələn İran millisində oynayan soydaşımız arenada çəkiliş edərək aparıcının hərəkətinə öz münasibətini göstərib:

“İndi Bakıda “Qarabağ”la “Arsenal”ın oyunudur. Uduzaq, ya udaq – heç fərq eləməz. O aparıcı ki televiziyada məsxərə edir, burada olsaydı, utanardı. Bu azarkeşləri ki görürsünüz, “Qarabağ”ın azarkeşləridir. Arzum odur ki, müvəffəq olaq. Yaşasın “Traktor”umuz, yaşasın “Maşınsazı”mız, yaşasın “Qarabağ”ımız, yaşasın Azərbaycan! Uduzmaq-udmaq bizim üçün mühüm deyil, mühüm olan birliyimizdir. O aparıcı isə bir az utansa, düşünürəm ki, yaxşı olar”.

Güneyli soydaşlarımız isə “Qarabağ” – “Arsenal” qarşılaşmasını izləməyə gələrək komandamıza öz dəstəklərini göstəriblər.

Seymur Rəhimov
Emtv.az