SON DƏQİQƏ

İnsan amili, onun sosial rifahının yüksəldilməsi, qabaqcıl səhiyyə xidməti ilə təmin edilməsi ölkəmizdə həyata keçirilən sosial-iqtisadi islahatların mühüm tərkib hissələrindən biridir.

Emtv.az yerli KİV-ə istinadən xəbər verir ki, Naxçıvan Muxtar Respublikası Səhiyyə Nazirliyindən, bu sözləri Şərur Rayon Mərkəzi Xəstəxanasında keçirilən Səhiyyə Nazirliyinin kollegiya iclasında nazir Niyazi Novruzov deyib.

Səhiyyə naziri bildirib ki, ulu öndər Heydər Əliyev tərəfindən əsası qoyulan bu alternativsiz inkişaf yolu ölkəmizin hər bir bölgəsində səhiyyə ocaqları üçün yeni binaların tikilərək istifadəyə verilməsində və müasir səhiyyə avadanlıqları ilə təmin edilməsində, həkimlərin peşə hazırlığının diqqət mərkəzində saxlanılmasında mühüm əhəmiyyət kəsb edir.

“Muxtar respublika rəhbərinin diqqət və qayğısı nəticəsində bu gün səhiyyə müəssisələrimizdə dünyanın qabaqcıl şirkətlərinin istehsalı olan müasir avadanlıqlarla, yeni texnologiyalarla müayinə və müalicə işləri aparılır. Şərur Rayon Mərkəzi Xəstəxanası da belə səhiyyə müəssisələrindən biridir” - deyən nazir vurğulayıb ki, burada müasir tibbi avadanlıq və cihazlarla müayinə, müalicə işləri aparılır, humanitar tibbi aksiyaların keçirilməsi ənənə halını alıb. Aztəminatlı ailələrdən olan xəstələrin muxtar respublikadan kənara getmədən mürəkkəb cərrahi əməliyyatlarının təşkili onlara həm maddi, həm də mənəvi dəstəkdir.

Kollegiya iclasında çıxış edən nazirliyin tibbi yardımın təşkili şöbəsinin müdiri Süleyman Cəfərov Şərur rayonunda əhaliyə göstərilən səhiyyə xidmətinin vəziyyəti, Naxçıvan Şəhər Gigiyena və Epidemiologiya Mərkəzinin direktoru Zeynəb Mənsumova isə Sədərək, Şərur və Kəngərli Rayon Gigiyena və Epidemiologiya mərkəzləri tərəfindən tibbi xidmətin təşkili barədə məlumat veriblər.

Müzakirə olunan məsələlərlə əlaqədar müvafiq qərarlar qəbul edilib.

Sonra kollegiya iştirakçıları Şərur Rayon Mərkəzi Xəstəxanasının maddi-texniki bazası ilə tanış olublar.

İsmayil İsmayilov
Emtv.az