SON DƏQİQƏ

“Türkiyə prezidenti Rəcəb Tayyib Ərdoğanla təkrar görüşümüz olacaq. Almaniya sabit bir Türkiyənin varlığını istəyir”.

Emtv.az xəbər verir ki, bunu Almaniyanın kansleri Angela Merkel Ərdoğanla keçirdiyi birgə mətbuat konfransında deyib.

Onun sözlərinə görə, Ərdoğanla görüşdə qaçqınlar məsələsini müzakirə ediblər: “ Türkiyə qaçqın məsələsində yüksək səviyyə nümayiş etdirməkdədir. Suriyadan gələn 3 milyondan artıq qaçqına ev sahibliyi edir. Görüşdə eyni zamanda İdlib məsələsini müzakirə etdik. İdlibdə çox mürəkkəb durum mövcuddur. Ona görə də oktyabrın ortalarında Suriya ilə bağlı Türkiyə, Rusiya, Fransa dövlət başçılarının iştirakçıları ilə bir toplantı keçirməyi planlaşdırırıq. Məüyyən məsuliyyətlər var”.

Merkel əlavə edib ki, terrorizmə qarşı mübarizə məsələsində də işbirliyini davam etdirmək fikrindədir: “Bu məqsədlə daxili işlər nazirliklərinin birgə fəaliyyətini canlandırmaq istəyirik. Xarici işlər nazirlikləri çox yaxşı fəaliyyət göstərirlər”.

Ərdoğan isə öz növbəsində bildirib ki, oktyabr ayında Merkel böyük bir nümayəndə heyəti ilə Türkiyəyə səfər edəcək: “Görüşdə ikitərəfli əlaəqlərimizin gələcəkdə necə inkişaf etdirəcəyimiz barədə fikir mübadiləsi apardıq”.

Türkiyənin Avropa İttifaqı arasındakı viza rejimi məsələsinə toxunan Ərdoğan deyib ki, bu məsələdə nəzərdə tutulan 6 kriteriya qısa zaman ərzində aradan qalxacaq: “İstər viza rejiminin, istərsə də gömrüklə bağlı məsələlər sadələşdirilərsə və əlaqələr gücləndirilərsə, bu, Türkiyə və Aİ-nin xeyrinə olacaq”.

PKK və FETÖ terror təşkilatları ilə bağlı birgə fəaliyyət məsələsi ilə bağlı verilən sualı Merkel belə cavablandırıb: “PKK Almaniyada qadağan olunub. Bütün aktivləri də qadağan edilib.Bu gün bunun detallarını müzakirə etməsək də, əvvəllər bu barədə çox müzakirələr aparmışıq. FETÖ məsələsinə gəldikdə isə Ankaranı yaxşı anlayırıq, lakin bununla bağlı biz daha çox bilgi lazımdır. PKK ilə bağlı da daha çox bilgi əldə etmək istəyirik. Çünki Almaniyada da axtarışda olanlar var. Hələ ki, bu məsələlərdə elə də lazımi nəticə əldə edə bilməmişik. Bəzi insanların Almaniyada olub-olmamasına əmin deyilik”.

Ərdoğan isə bildirib ki, bu gün minlərlə PKK terrorçusu Almaniyada məskunlaşıb. “Onların dağınıq halda yerləşməsi başqa söhbətdir. FETÖ-yə gəlincə isə deyə bilərəm ki, bu təşkilatın yüzlərlə mənsubu Almaniyadadır. Lazım olarsa, bizim xəfiyyə orqanlarının birgə fəaliyyəti ilə onların yerini müəyyən etmək olar”.

Seymur Rəhimov
Emtv.az