SON DƏQİQƏ

Naxçıvan Muxtar Respublikasında bütün sahələrdə insanların rahatlığının təmin edilməsi üçün müxtəlif tədbirlər həyata keçirilir. Çimərlik istirahət zonasında da su və digər idman növləri üzrə yarışların, eləcə də gənclərin iştirakı ilə müxtəlif tədbirlərin keçirilməsi üçün hər cür şərait yaradılıb.

Emtv.az azərtac-a istinadən xəbər verir ki, bu sözləri Naxçıvan şəhər çimərliyində növbəti mövsümün başlanması münasibətilə keçirilən tədbirdə Naxçıvan Muxtar Respublikasının gənclər və idman naziri Azad Cabbarov deyib.

Nazir bildirib ki, çimərlikdə istirahət edənlərin istifadəsinə skuter, pedallı qayıq verilib, burada futbol və voleybol meydançaları fəaliyyət göstərir. Bu da isti yay günlərində sakinlərin və şəhərə gələn qonaqların istirahətinin səmərəli təşkilinə imkan verəcək.

Sonra Naxçıvan Muxtar Respublikasının fövqəladə hallar nazirinin müavini, general-mayor Hikmət Kərimov yeni mövsümdə Naxçıvan şəhər çimərliyində həyata keçirilən tədbirlər barədə məlumat verib, burada göstəriləcək təhlükəsizlik xidmətlərindən danışıb.

Qeyd edək ki, yeni mövsümə çimərlikdə yüksək səviyyəli istirahət və xidmət üçün 20 çətir, 4 duş kabinəsi quraşdırılıb, 100 yerlik paltarsaxlama və 4 soyunub-geyinmə yerləri hazırlanıb, restoran və digər xidmət sahələri fəaliyyət göstərir. Burada təhlükəsizlik tədbirləri də diqqətdə saxlanılır, müşahidə qülləsi yaradılıb, ərazidə xəbərdaredici və məlumatlandırıcı lövhələr vurulub. Naxçıvan Muxtar Respublikası Fövqəladə Hallar Nazirliyinin 5 nəfərdən ibarət xilasetmə qrupu ərazidə xidmət aparacaq.

İstirahət zonasının ümumi sahəsi 10 min 260 kvadratmetrdir. Burada böyüklər və uşaqlar üçün nəzərdə tutulmuş iki çimərlik var. Uşaqlar üçün çimərliyin uzunluğu 22, eni 38 metr, dərinliyi isə 70-120 santimetrdir. Böyüklər üçün çimərliyin uzunluğu 248, eni 38, dərinliyi isə 2-4 metrdir. Suyun üzərində çimərlik sərhədinin qurtardığını bildirən qadağanedici nişanlar qoyulub.

Çimərlik hər gün axşam saat 20:00-dək açıq olacaq. Naxçıvan şəhərindən çimərliyə və əks-istiqamətə avtobus xidməti də fəaliyyət göstərəcək.

Emtv.az