SON DƏQİQƏ

Ümummilli lider Heydər Əliyevin anadan olmasının 95-ci ildönümü, Azərbaycan Xalq Cümhuriyyətinin 100 illik yubileyi və Azərbaycan Respublikası Dövlət Gömrük Komitəsinin yaradılmasının 26-cı ildönümü münasibətilə ölkəmizin gömrük orqanları arasında təşkil olunan futzal çempionatına yekun vurulub.

Emtv.az naxcivantv.az-a istinadən xəbər verir ki, aprel ayının 12-də start götürən ənənəvi yarışda ümumilikdə 12 komanda mübarizə aparıb. Oyunlar Azərbaycan Texniki Universitetinin Bakı şəhərindəki idman sarayında keçirilib. Mübarizəyə ikinci mərhələdən qoşulan Naxçıvan Muxtar Respublikası Dövlət Gömrük Komitəsinin komandası ““Azərterminalkompleks” Birliyi”, “Tovuz Gömrük İdarəsi” və “Sumqayıt Baş Gömrük İdarəsi” komandaları ilə birgə “B” qrupunda mübarizə aparıb. Müvafiq olaraq 9:3, 11:0 və 7:1 hesablı qələbələrlə qrupdan birinci çıxan komandamız yarımfinal görüşündə “Astara” Gömrük İdarəsi”ni 10: 1 hesabı ilə məğlub edib.

May ayının 10-da baş tutan final qarşılaşmasında “Naxçıvan” komandasının rəqibi “Azərbaycan Respublikası Dövlət Gömrük Komitəsi” olub. Naxçıvanlı gömrükçülər bu görüşdən də 4:3 hesabı ilə qalib kimi ayrılıblar.

Beləliklə, yarışda birinci yerə “Naxçıvan”, ikinci yerə “Azərbaycan Respublikası Dövlət Gömrük Komitəsi”, üçüncü yer isə “Astara” komandaları çıxıblar.

Sonra komandaların və fərqlənən oyunçuların mükafatlandırılması mərasimi olub. “Naxçıvan” komandasının üzvlərindən Rahil Tahirli çempionatın “Ən yaxşı qapıçı”sı, final qarşılaşmasında dubl edən Orxan Məmmədov “Ən məhsuldar oyunçu” seçilib. Milli Olimpiya Komitəsinin Ədalətli Oyunlar Komissiyası “Naxçıvan” futzalçılarından Ramazan Ağayevi “Ədalət prinsiplərinə sadiq idmançı” nominasiyası üzrə mükafatla təltif edib. Eyni zamanda, Naxçıvan Muxtar Respublikası Dövlət Gömrük Komitəsinin sədri, gömrük xidməti general-leytenantı Asəf Məmmədov komissiyanın fəxri kobokuna layiq görülüb.