SON DƏQİQƏ

ABŞ-ın İranla nüvə müqaviləsindən çəkilməsi Yaxın Şərqdə prosesləri yenidən qızışdırıb.

Emtv.az xəbər verir ki, Vaşinqtonun müttəfiqi İsrailin raketlərlə Suriyadakı İran hədəflərini vurmasından sonra, Birləşmiş Ştatlar rəsmi Tehrana yeni sanksiyalar tətbiq edib. İlk sanksiya paketi avqustun 6-da, ikincisi isə 4 noyabrda dövrəyə girəcək.

ABŞ Maliyyə naziri Stiven Mnuchin yeni sanksiyaların İran İnqilab Mühafizəçiləri ordusu ilə əlaqələri olan altı nəfəri və üç qurumu əhatə etdiyini söyləyib. Vaşinqtonun iddiasına görə, siyahıya salınanlar İnqilab Qvardiyasına milyonlarla dollar ötürən şəxslərdir. Sanksiyaların hədəfində olanların hamısı İran vətəndaşıdır, şirkətlər də İranda qeydiyyatdadır.

İran Mərkəzi Bankı da ittihamların mərkəzindədir. İttihamlara görə, İnqilab Keşikçiləri Ordusu bank vasitəsilə legal olmayan yollardan milyonlarla dollar vəsait əldə edirmiş.

ABŞ sanksiya qərarını müttəfiqi Birləşmiş Ərəb Əmirlikləri (BƏƏ) ilə birlikdə qəbul edib. BƏƏ, sanksiya siyahısındakı iranlılarla və şirkətlərlə iş görülməsini qadağan edib.

İran isə bu gün səhər rəsmi televiziya vasitəsilə İsraili hədəf aldıb. Xarici İşlər Nazirliyinin sözçüsü Bəhram Kasami dünyanın İsrailə cəsarət verdiyini deyib. “İran İsrailin hücumlarını sərt şəkildə qınayır. Beynəlxalq ictimaiyyətin sükutu, İsrailə cəsarət verir.”

Nüvə müqaviləsinin tərəflərindən olan Almaniya, bu gün bir açıqlama edərək İranla ticarət edən şirkətlərə yardım etməyə hazır olduğunu bildirib. Almaniya İqtisadiyyat naziri Piter Altmaier bunları deyib. “Narahat olan bütün şirkətlərə mənfi nəticələri minimuma endirmək üçün kömək etməyə hazırıq.”

Tramp masadan qalxsa da, müqavilədə imzası olan ölkələr İngiltərə, Fransa, Almaniya, Rusiya və Çin mövcud rəsmi Tehranı müdafiə edib. Sözügedən ölkələr İranla müqavilənin davam etməsini istəyir.

Emtv.az