SON DƏQİQƏ

Barda qıza sataşan oğlanın başından ağır xəsarət yetirməkdə təqsirləndirilən İslam Yusifovun məhkəməsi keçirilib.

Emtv.az-ın məlumatına görə, Bakı Ağır Cinayətlər Məhkəməsində hakim Səbuhi Hüseynovun sədrliyi ilə keçirilən prosesdə prokuror ittiham aktını elan edib.

İ.Yusifov ittiham üzrə özünün təqsirli bilib: “Elnarə ilə klubda tanış olmuşduq, orada işləyirdi. Onu əvvəldən tanımırdım. Ailəmi rayona göndərmişdim, özüm də gecə kluba getdim. içkili idim, Elnarə də içkili idi. Orda Kamil bir neçə dəfə qıza yaxınlaşdı, qız ona, necə deyərlər, "otval" verdi. Buna əsəbləşən Kamil qızı narahat eləməyə başladı. Mənə xoş gəlmədi. Çünki qız mənlə idi. Yaxınlaşıb Kamilə dedim, bu nə hərəkətdir edirsən?! O da məni söydü, mübahisə etdik, sonra aralaşdıq. Mən onu vurmaq istəmirdim, böyük bir səbəb də yox idi. Kamillə barışmışıq".

Zərərçəkmiş prosesdə deyib ki, İslam Yusifova qarşı heç bir şikayət və tələbi yoxdur: "Qıza cəmi bir dəfə yaxınlaşdım. Klubda qızla bağlı mənə hər hansı bir irad bildirilmədi. Orada öz aramızda mübahisəmiz düşdü, sonra sakitləşdik. Səhərə yaxın saat 5-də evə getdim. İçkili idim deyə biraz binanın həyətində dayandım. Siqaret çəkəndə kimsə arxadan vurdu, nə ilə vurduğunu da görmədim. Məni İslamın vurduğunu da görmədim. Sadəcə, istintaqda dedim ki, hadisədən əvvəl klubda bir oğlanla mübahisəmiz düşmüşdü".

Proses mayın 8-də davam edəcək.

Qeyd edək ki, hadisə bu il paytaxtın Nizami rayonunda baş verib. İslam Yusifov gecə saatlarında "Siyah-beyaz" gecə klubunda əylənərkən Kamil Cəlilovun orada işləyən Elnarə adlı qıza dəfələrlə yaxınlaşdığını görüb. K. Cəlilov bir dəfə qızın yaxasından tutduğu üçün İ. Yusifov ona yaxınlaşaraq iradını bildirib. Aralarında olan mübahisədən sonra o, Kamili izləyib və Qarayev prospektində yerləşən binaların həyətində onu arxadan vuraraq yerə yıxıb və döyüb. Nəticədə K. Cəlilov baş və bədən nahiyələrindən ağır xəsarətlər alıb.

Faktla bağlı cinayət işi açılıb. Şübhəli şəxs kimi saxlanılan İslam Yusifov cinayət əməlini etiraf edib. Ona Cinayət Məcəlləsinin 126.1 (qəsdən sağlamlığa ağır zərbə vurma) maddəsi ilə ittiham verilib.

Emtv.az