SON DƏQİQƏ

Müstəqil Azərbaycan dövlətinin memarı və qurucusu, dünya şöhrətli siyasi xadim, xalqımızın ümummilli lideri Heydər Əliyevin vəfatından 14 il keçir.

Emtv.az xəbər verir ki, dekabrın 12-də “Azərbaycanın Səsi” İctimai Birliyinin sədri, “Müstəqil Lider” jurnalının baş redaktoru, "Heydər Əliyev" və "Azərbaycan Bayrağı" mükafatçısı Faiq Əhmədov və Bakı Dövlət Universitetinin kafedra müdri, professor Əsədullah Qurbanov respublikanın bir qrup tanınmış ziyalıları ilə birlikdə Fəxri Xiyabana gələrək xalqımızın ümummilli lideri, Ulu Öndər Heydər Əliyevin məzarını ziyarət etmişdilər.

Daha sonra “Azərbaycanın Səsi” İctimai Birliyinin sədri, “Müstəqil Lider” jurnalının baş redaktoru, "Heydər Əliyev" və "Azərbaycan Bayrağı" mükafatçısı Faiq Əhmədov Bakı Dövlət Univerisitetinin professoru Əsədullah Qurbanovla birlikdə Ulu Öndərin ömür-gün yoldaşı, görkəmli oftalmoloq-alim, akademik Zərifə xanım Əliyevanın da məzarı üzərinə gül dəstələri qoyaraq ruhuna dualar oxudular.



Eyni zamanda da tanınmış dövlət xadimi Əziz Əliyevin və professor Tamerlan Əliyevin də xatirələri də yad edilərək, ruhuna dualar oxunmuşdur.

Qeyd edək ki, əməkdaşlarımız Faiq Əhmədovdan müsahibə almışdılar. Həmin müsahibəni olduğu kimi izləyicilərimizə təqdim edirik.

-Faiq müəllim, Azərbaycan xalqının tarixində öz yeri olan, müstəsna xidmətləri ilə seçilən görkəmli şəxsiyyətlər çox olmuşdur. Lakin Heydər Əliyev dühası bütün bu şəxsiyyətlər arasında ən yüksək zirvəni fəth etmiş və xalqımızın yaddaşında özünə xüsusi, əvəzolunmaz yer tutmuşdur. Sizcə Ulu Öndərimizin bənzərsizliyini, onun unikallığını təmin edən hansı keyfiyyətlər olub?

-Həqiqətən də bizim xalqımız özünün bir çox tarixi şəxsiyyətləri ilə fəxr edə bilər. Lakin həmin şəxsiyyətlərin içərisində Azərbaycan xalqının ümummilli lideri adını qazanmaq yalnız Heydər Əliyevə nəsib olmuşdur. Ulu Öndərimizin keçdiyi şərəfli ömür yolunu öyrənərkən görmək olur ki, bu dahi şəxsiyyət fəaliyyət göstərdiyi bütün sahələrdə özünü məhz lider kimi göstərə bilmişdir. Tarixi zərurət gəldiyi zaman isə, bu liderlik xüsusiyyəti özünün həm siyasi, həm ideoloji, həm də milli təzahürlərində böyüyərək Heydər Əliyevi ümummilli lider məqamına çıxarmışdır. Unutmaq olmaz ki, bu yüksək məqam bütün digər zəruri keyfiyyərtlərlə yanaşı həm də ümumxalq sevgisinin, yüksək etimad və etibarın mövcudluğunu tələb edir. Azərbaycan xalqı isə, dövlətimizi yox olmaqdan, ölkəmizi parçalanmaqdan xilas etmiş öz böyük oğlundan bu sevgini heç zaman əsirgəməyib.



-Bildiyiniz kimi Ulu Öndərimizin anım günü bu gün təkcə Azərbaycanda deyil, həmçinin dünyanın bir çox ölkələrində, o cümlədən Moskva, Vaşinqton kimi dünya siyasətinin yönəldildiyi paytaxt şəhərlərdə də qeyd olunub. Bu barədə nə deyə bilərsiniz?

-Əlbəttə ki, Heydər Əliyev sadəcə Azərbaycanda deyil, keçmiş SSRİ səviyyəsində, hətta dünya miqyasında tanınan, hörmət və nüfuza malik urvatı olan siyasi lider və dövlət xadimi idi. Onun dahiliyi, əlçatmazlığı hələ özünün sağlığında dünyanın böyük siyasətçiləri, dövlət xadimləri, müdrik insanları tərəfindən qəbul edilmiş, etiraf olunmuşdur. Məsələn, YUNESKO-nun sabiq direktoru Federiko Mayor ümummilli liderimiz barədə bu sözləri demişdir: “Heydər Əliyev bütün dünyanın etiraf etdiyi görkəmli liderdir”. Həmçinin keçmiş SSRİ-nin tanınmış dövlət xadimlərindən biri olan Eduard Şevardnadze isə, bu fikri bir qədər də qüvvətləndirərək belə söyləmişdir: “XX əsr liderlər əsridir. Əsrin lideri isə, Heydər Əliyevdir”. Heç şübhəsiz Heydər Əliyev dünya səviyyəsində düşünməyi və təhlillər aparmağı bacarırdı. Bu dahi insan tarixi yazan və yaradan, onu yönəltməyi bacaran nadir şəxsiyyətlərdən idi. Məhz bütün bu və bir çox digər keyfiyyətləri, o cümlədən siyasi uzaqgörənliyi və müdrikliyi, düşünülmüş və yeganə doğru qərar vermək bacarığı, qətiyyətliliyi və siyasi iradəsi, dərin zəkası və geniş dünyagörüşü Heydər Əliyevi dünya səviyyəli siyasi liderlər cərgəsinə çıxarmış və burada da aparıcı mövqeyə sahiblənməsini təmin etmişdir.



-Faiq müəllim, artıq 14 ildir ki, Azərbaycan Ulu Öndərimizin cismani yoxluğunda yaşayır və inkişaf edir. Sizcə bu ötən müddət ərzində xalqımız Heydər Əliyevin siyasi irsinə kifayət qədər sahib çıxa bilmişdirmi?

-Heç şübhəsiz, bu sualı yalnız müsbət cavablandırmaq olar. Elə son on dörd ildə Azərbaycanda gedən mütərəqqi proseslər, ölkəmizin sürətli inkişaf tempinə nail olması və hazırda Cənubi Qafqaz regionunun şəriksiz lider dövlətinə çevrilməsi də məhz ölkədə Ulu Öndərimizin siyasi xəttinin uğurla davam etdirildiyinin əsas göstəricilərindən biridir. Və əlbəttə ki, xüsusi olaraq qeyd olunmalıdır ki, bu gün Azərbaycanda Heydər Əliyev siyasi kursunun uğurla davam etdirilməsində onun ən layiqli davamçısı, möhtərəm prezidentimiz cənab İlham Əliyevin xidmətləri müstəsna əhəmiyyət kəsb edir.



Bu gün dövlət başçımızın müdrik rəhbərliyi altında respublikamızda bütün sahələrdə aparılan uğurlu islahatlar, əldə olunan yüksək nəticələr isə, xalqın sabaha olan inamını getdikcə daha da artırır, Heydər Əliyevin memarı olduğu müasir, müstəqil Azərbaycanın etibarlı əllərdə olduğuna möhkəm əminlik yaradır. Məhz Heydər Əliyev siyasi kursunun bu gün də ölkəmizdə uğurla davam etdirilməsinin nəticəsidir ki, xalqımız Prezident İlham Əliyevin ətrafında daha sıx birləşir və bununla da xalq-dövlət vəhdətini təmin etmiş olur. Bunun nəticəsində isə, müstəqilliyimiz getdikcə möhkəmlənir, dövlətimiz qüdrətlənir və Azərbaycanın beynəlxalq aləmdə nüfuzu və rolu, dünya siyasətinə təsir imkanları hər gün daha da artır.
Hazırladı: Türkan Xubiyarova, Aynurə Kərimli,
Fotolar; Elmara və Seymura məxsusdur.
Emtv.az