SON DƏQİQƏ

AMEA Naxçıvan Bölməsinin aparıcı əməkdaşlarının - Elxan Məmmədovun “Eynəli bəy Sultanov və folklor”, Çinarə Rzayevanın “Hüseyn Cavid və folklor”, Leyla Səfərovanın “Azərbaycanda ingilis dili qrammatikasının tədqiqi tarixi”, Ramiz Qasımovun və Zülfiyyə İsmayılın həmmüəllifi olduqları “Azərbaycan ədəbiyyatında milli düşüncə konsepsiyası və Azərbaycançılıq ideologiyası” adlı monoqrafiyaların təqdimat mərasimi keçirilib.

Emtv.az xəbər verir ki, bölmənin informasiya şöbəsindən bildirilib ki, tədbirdə AMEA Naxçıvan Bölməsinin sədri, akademik İsmayıl Hacıyev çıxış edərək institut əməkdaşlarının son illərdə müxtəlif istiqamətlərdə sanballı еlmi əsərlər, o cümlədən dəyərli monoqrafiyalar, kitablar çap etdirdiklərini deyib. Bildirib ki, təqdimatı keçirilən dörd monoqrafiya müəlliflərin apardığı məhsuldar tədqiqatların uğurlu nəticəsidir.

Təqdimat mərasimində institutun musiqi və teatr şöbəsinin böyük elmi işçisi, sənətşünaslıq üzrə fəlsəfə doktoru Ələkbər Qasımov, filologiya üzrə fəlsəfə doktorları Zülfiyyə İsmayıl, Əli Həşimov və Nuray Əliyeva geniş məruzə ilə çıxış edib, yeni nəşrlərin əhəmiyyətini vurğulayıblar.

Məruzələr ətrafında bölmənin elmi katibi Əkrəm Hüseynzadə, filologiya üzrə fəlsəfə doktorları Rəşad Zülfüqarov, Aygün Orucova və institutun əməkdaşı Vəfa Qasımova ictimaiyyətə təqdim olunan monoqrafiyaların üstün cəhətləri barədə fikirlərini tədbir iştirakçıları ilə bölüşərək müəlliflərə gələcək elmi fəaliyyətlərində uğurlar arzulayıblar.

Emtv.az