303 avtobus və mikroavtobus, 496 taksi texniki müayinədən keçirilib
Naxçıvan Şəhər Nəqliyyat İdarəsində 2017-2018-ci ilin payız-qış mövsümünə hazırlığın vəziyyəti müzakirə edilib.Emtv.az azərtac-a istinadən xəbər verir ki, seminar-müşavirədə Nəqliyyat nazirliyinin nəqliyyatda əlaqələndirmə və lisenziyalaşdırma şöbəsinin müdiri Yasin Əliyev çıxış edərək bildirib ki, avqustun 26-da Naxçıvan Muxtar Respublikası Ali Məclisində 2017-2018-ci illərin payız-qış mövsümünə hazırlıq və qarşıda duran vəzifələrlə əlaqədar müşavirə keçirilib. Müşavirdə nəqliyyat-yol kompleksi qarşısına da mühüm vəzifələr qoyulub. Tapşırılıb ki, Nəqliyyat nazirliyi qış aylarında xəttə buraxılacaq nəqliyyat vasitələrinin qrafik üzrə hərəkətinə, Daxili İşlər nazirliyi ilə birlikdə həmin nəqliyyat vasitələrinin texniki cəhətdən saz vəziyyətdə olmasına nəzarəti gücləndirməlidir.Vurğulanıb ki, payız-qış mövsümünə hazırlıqla əlaqədar olaraq xüsusi komisiya yaradılıb və bu komisiya nəqliyyatın intensiv hərəkətinin təmin edilməsini daim diqqət mərkəzində saxlayır. Avqust ayının 11-dən 15-dək 303 avtobus və mikroavtobus, 496 taksi texniki müayinədən keçirilib. Sərnişindaşıma fəaliyyəti ilə məşğul olan avtonəqliyyat vasitələrinin saz vəziyyətdə saxlanılması üçün sahibkarlarla maarifləndirmə işi aparılıb.Naxçıvan Şəhər Nəqliyyat İdarəsinin rəis əvəzi İlkin Məmmədov bildirib ki, hazırda avtobusların işlək hissələri və digər mexanizmlərin sazlanması təmin edilir, mühərriklərin yağları dəyişdirilir, avtobusların daxili qızdırıcı sistemləri və digər hissələrdə təmir işləri aparılır.Nəqliyyat nazirliyinin nəqliyyat müfəttişliyi və təhlükəsizlik şöbəsinin müdiri Elxan Novruzov görülən işlər barədə geniş məlumat verib və bildirib ki, qış aylarında sərnişindaşımada heç bir çatışmazlıq olmayacaq. Emtv.az