SON DƏQİQƏ

Naxçıvan Günəş Elektrik Stansiyasının istehsal gücünün artırılması davam edir. Emtv.az azərtac-a istinadən xəbər verir ki, stansiyada əlavə günəş panellərinin quraşdırılması başa çatdırılıb. Beləki qurulan 7 min 723 günəş paneli vasitəsi ilə ildə 3 milyon kilovatsaata qədər əlavə enerji istehsal olunacaq.

Günəş Elektrik Stansiyasının istehsal gücünün artırılmasına bu ilin aprel ayından başlanılıb. Əsas işlər isə artıq yekunlaşdırılıb. Günəş panelləri vasitəsi ilə istehsal olunan enerji artıq şəbəkəyə ötürülərək sınaq işləri aparılır. Sınaq işləri başa çatdıqdan sonra isə günəş panellərinin gücündən tam istifadə olunacaq.

Qeyd edək ki, İsveçrənin Ped Şirkəti ilə imzalanan müqaviləyə əsasən, Günəş Elektrik Stansiyasında 3.8 hektar ərazidə 7 min 723 əlavə günəş panelləri quraşdırılıb. Günəş panellərinin quraşdırıldığı sahənin 2 hektarı stansiyanın əvvəlki ərazisindəki boş sahələr, 1.8 hektarı isə əkin üçün yararsız sahələrdir.

Günəş panelləri şəbəkəyə tam qoşulduqdan sonra stansiyanın istehsal gücü 30 milyon kilovatsaatdan 33 milyon kilovatsaata qədər artacaq. Layihə alternativ enerji mənbəyi kimi, Naxçıvanın enerji təminatının tamamilə təbii ehtiyyatlar hesabına ödənilməsində mühüm rol oynayacaq.

2016-cı ildə Günəş Elektrik Stansiyasında 29 milyon 922 min kilovatsaat elektrik enerjisi istehsal olunub ki, muxtar respublikada elektrik enerjisinə olan təlabatın 20 faizi bu stansiya vasitəsi ilə təmin olunub.

Emtv.az